السماء مغيمة ،الكيت في وذني،المخ هايم،هزتني ساقي نلقى روحي قدام الجبانة،مشيت كالعادة لقبرو نحكيلو ،ٱه قداه توحشتو ،توحشت الصاحب ،الخو ،وينك ...

لشكون بش نشكي،قلبي معبي بالكلام ،لا كتيبة نفعت بش نخرجو ،لا لشكون بش نحكيه ،كلام محصور بين جواجيا،عام بعد عام يتعدى ،

وتو ثلاثةسنين يتعدو في رمشة عين ،

ثلاثة سنين كل وين تضيق بيا الدنيا نلقى روحي قدام قبرك ،قداه بش نحكي وقداه بش نبقى ساكته ،

ثلاثة سنين لا ريتك لا كلمتك،وينك يا روحي و عشيري كيفاه متحمل برد الشتا قبرك يكوي بالبرد وحدك في قبرك لا حبيب يتفكرك و لا صاحب يونسك غادي غير ربي سبحانو..

من نهارت لي مشيت وانا الجبانه ثنيتي.كل وين نتوحشك ،نطلب من ربي بش تطل عليا في منامي ،وينك لشكون بش نشكي ونبكي ملي عملوه العباد فيا ، تتذكر نهارت لي قتلي تمشيشتنسيني ..

آه هو نهار نجم نحيك من بالي ،كل وين نتذكرك ،نتذكر ها الكلمتين،نتذكر كي قتلي خليك كيما انت ،إللي يحبك يحبك كيما انت ،،تي هام في وجهي ضحكة صفراء وفي قفايا خناجر ...

كان تعرف شصاير فيا ما يزينيش المرض يزيد عليا غدر لعباد و نفاقهم لي نعطيه ثيقتي يغدر بيا ، حرت و حار دليلي دلني يا عشيري راني ضايعة فيها الدنيا تي تكلم علاش ساكت لشكون باش نحكيلو غيرك و شكون باش يفهمني ..

شكون..