عام و شهر و نهار و ساعة تعدّاو على آخر مرة شفتك فيها ....في الظهر بكيت ، في المغرب صلّيت و في الفجر دعيت .. نحب ننساك ، نحب غيرك كيف إنت طلعت منياك  

في العادة نسّاية كان هاذي مانسيتهاش !!!

في العادة قويّة كان هاذي ما نجّمتهاش !!!

عرفتك صدفة ، رتحتلك ، صوحبتك و مستقبلنا كيف ما كنت تقول ناداك .. تصبر ؟ نصبرو...  تستنّا ؟ نستنّاو ؟ تخون ؟ نخون الدّنيا و إنت ما نخون .......  

كهو مشيت .. تغرّبت ..

مامشيتش هاني معاك .. غربتي تهون كيف إنت ليّ بش تكون ..

عام و نكونو لبعضنا و أمك تزغرط في فرحنا ..

و فا العام و ما جيتش .. ما نجمتش تروّح .... صعبت عليّا و بدا لبعد فيّ يتعّب و الوحدة فيّ تعذّب

ما تضعفش ما تيأسش كيما تعداّ عام يتعداّو عامين ..

و طلعت أقوى مليّ نتصوّر و ما خلّيتوش يغلبني

غدوة تروّح .. في حضني بش تتلوّح و صبري معاك

بش تعوّض ..

يا ليتك ما روّحت و علا قلبي ما عفسّت

» نجيك للمطار ؟- لا دارنا جايين .. و أنا مش من داركم .. نحبّك بقدرك و نجيب دارنا و نجي لمّك ..

نهار .. إثنين .. خمسة بش حنّيت و تفاضيت و ليّ جيت ..

نوصل للعين و ما نشربش و إلي عدّا عامين يعدّي نهارين ..

جيت عندي جريت و في حضني ترميت و على وحشتي غطّيت

غريبة .. مش كيما تمنّيت .. مش ريحتك شمّيت

مش قلبك مسّيت ..

عينيك منّي تتهرّب و عينياّ تتعجّب

تحبني ؟ أكثر .. تخطبني ؟ لخميس تكون ليّ

و على صبرك نجيبلك هدّية و أمك تبات  مرضيّة

.... ياخي طلعت علجيّة .. بسهولة عدّيتها عليّا

لا خميس جيت .. لا قدري علّيت و لا أمّي رضّيت..

لتوّ ما نسيت .. غيرك ما حبّيت و غدرك ما عفيت .. و دمعي ما كفّيت ...