لا موضوعَ محدّد
Hiba Mezni - هبة المازنيما يلزك عالمر كان اللي أمر
إنّي نلوّج على حقيقة ناقف عليها وعلى حلمة نعيشلها
إنّي نفركس على واقع وعلى حلمة نتبعها
اني نفركس على قدر
وقت الجوجمة و الفوضى العميقة يفكرني فيك
يفكرني نسوق ناصبو في مخي و تصويرة تجبدني ليك
يفكرني بسلعة رخيصة وواقع متضارب
بالعيشة اللي تقتل و بالاديلولوجيا اللي تكبّل
وتفكرني في الوقت الي مشيت فيه على قارب من القوارب
... لفينيز
وقت الجوجمة و الزحام يوفا علينا الكلام
و وقت الحيرة, تتلفت من شيرة لشيرة تلوج على التعبير اللي يمثلك و يحكي عليك
ما تلقاش..
فينيز. فينيز حزينة
في الشتا نرجعو للكتابة في الأجندات
نتوحشو عاداتنا القديمة في الثرثرة عالسطور
كلام لا يبل لا يعل يمكن نخملوه يمكن قربان لحياتنا نقدموه و يمكن يبقى منثور
نحسّو بنستلجيا عميقة للكتيبة بالدم, للماووشية اللي نمارسوها في الكتابات
نتوحشوا تعنيقة قوية و بوسة مرصوصة على خاطر البلومة بردت ومن الشكوى عيات
..
مزّال عندي ما نقول
مزّال عندي ما نحكي, وعندي ما نجرّب, مزّال حديثي يطول
ما نحبش نموت
ما نحبّش القلم يموت
ما نحبش ريحة الحبار من عالورقة تموت
مزال عندي ما نقول
للمثيولوجيا الاغريقيّة أقول:
أبولو, مزال عندي ما نقول
مزالت احاديثي تتعمّق
وعندك انتي تاقف وتتفرق
يدّي تعرق
وفنيزيا مزالت حزينة
وأنا مزلت من روحي هاربة
وخايفة توفا الزنقة بيّا
و أنا مزلت نرمي الستيلو بعد التخربيش في أبعد تركينة
و مازلت نبعد عليك
ونكرهك كي نرا روحي في كلمة من كلامك ولاّ في خزرة من عينيك
نتذكر مَرَّة
مُرّة
تعديت عليا بالكلام
في حديثك عليا تعديت وعلى غفلة صورتلي بكلامك روحي
علاش تحير فالمواجع؟
علاش تعبثلي بجروحي؟
خلني تحت الغطا متخبية و مستورة
خلي التصويرة الحلوة اللي علقتها في مخي محفورة
ونعاودو تدوليشة مزيانة فالقارب
ونعاودو نفركسو عالثنية لفينيزيا
يا خوفي توفى الزنقة بالهارب
و تضيع بينا الثنايا
... كانت عندي ليك حكاية
أما نسيت...
بقلم هبة المازني
Website Design Brisbane