كيف يغيب الكلام على اللسان

Syrine Rhouma - سيرين رحومة

كيف يغيب الكلام على اللسان و تتهدّ النّفوس من كثر الأحزان

ينطق القلم و يخلق الحروف من عدم , و الحبار يولّي دم...

وقتها عرفت الّي النسيان كذبة كبيرة و الّي الوقت ما ينسّيش

و الدّنيا قصيرة و الّي هزتو منّي الموت ما يبقى كان في بالي يعيش

عرفت الّي الناس ذيوبة اذا غفلت ما ترحمنيش

و عرفت الّي كل لحظة عليّا محسوبة والدّنيا اذا بركت ما تستنّانيش

عرفت الّي الحب حلمة ما توفاش

كلمة في القلب موشومة ما تتنحّاش

عرفت الّي السّماح ساهل أما الغلطة ما تتنساش

عرفت الّي العين على الحاجب ما تعلاش

و الّي عاش ذليل يموت ذليل و ما يترقّاش

مشات ناس و جات ناس

حزنت و قالولي هاذاكا حد ال باس

تعلّمت اذا نطيح نقوم حتى كان الهم عليا اكداس

و الّي مهما كان القلب مغموم نضحك و نقول لاباس

تعلّمت الّي النجاح مايجيش ببلاش

و الفرحة تتفك و ما تتعطاش

و الّي الدّمعة دايمة و الضحكة ما تبقاش

كيف يغيب الكلام على لساني

و الصاحب في غفلة ينساني

نشوف الدّنيا بعين البرّاني

و نقول يا ليتني سمعت كلام الّي وصّاني..

كيف يغيب الكلام على لساني

نعرف الّي أنا قويّة

و الجبال الرواسي ما تهدّنيش

مهما كتبت القلم ما يرضّينيش

و الأرض مهما وساعت ما ترفعنيش

و العمر مهما طوال ما يكفيش نعيش...

بقلم سيرين رحومة