كنت معمية
Khaoula Lassoued - خولة لسودكنت معميا.
و انت الضو لي نورلي عينايا..
كنت ضايعة
و انت كنت الثنية.
كنت السحابة الكحلة لي ما تبكيش،
و انت المطر لي تسقي الزرع و الورد و تبل الريش.
ريش الحمامة البيضا، لي بياضها يجهر العينين .
حمامة كي قلبك الحنين، الحزين، المسكين...
متروك.. رهينة في تركينة
ضايع و في وجيعتو لايع...
صوتو بح و هو يدادي و يلاجي من بقعة لبقعة..!
يلوج يلقاشي شطرو لي خلاه في نهار مغيم، مظلم، معتم،..
زعما هي هكا الحكاية ولا نعكسووها؟
قلبك يشبه لقلبها لي عياو و هوما يخليو فيه.
تعرف؟
في نهار، قالولها علاش تكتب؟
علاش في جرحك تلهب؟
قولش عليك عالجرح في الملح تذر و تسكب.
و تكذب...، تقول لباس، الكتيبة تداوييني...
و انت من داخل تدعي و تقول يا ربي ما تفضحنيش عيني...
ويني الضحكة من القلب؟
و رفيق الدرب..
لي قال ما يخليني؟
و وين الحب؟
ولا قعد في الكتب؟
يزييني منك، و منهم و خليني.
خليني نكتب و نكذب و نطفي النار لي شاعلة في كنيني..
في نهار .. جيت و قعدت بجمبي و قعدت تخرف و تحكي سوايع..
كنت تقلي :
وقت خليتك و كل حد شاف ثنية ..
ضعت و لقيت روحي بلا روحي..
لا هدية، لا صبية تمسح الدمعة و لا حد يحب يعمل عليا مزية ..
و يوريني الصحيح..
مادام قلبي طلع معايا موش مليح ..
و مخي مشا مع الريح ..
نصييييح و نضرب في راسي ..
ضعت، تليعت و قريب نباصيي.
أرجعلي يا خلاصي، يا وردتي، يا دنيتي خليني نعرف ساسي من راسي ..
قتلي زادة لي ما فماش كيفي!
قتلي انت مدينتي و ريفي ..
الوردة المفتحة، الياسمينة المفوحة!
قتلي انت الظلمة و النور
الصحراء و الخضار!
الدار و النوار
الدا و الدوا! ..
قعدت تحكي و تحكي و تحكي، و هي سارحة فيك و في عينيك!
ما تعرش لي هي ليك، و بيك تعيش، و منك ما تشفيش.
ما تعرش لي هي سامحتك قبل حتى ما تطلب السماح
خولة لسود
Website Design Brisbane