كراسة بلا حروف...
Maryem Ayari - مريم العياريعرش علاه كل ما نشد الستيلو تجي في مخي كان انتي بش نكتب عليكو نوصف عينيك
تتحير المواجع و الدمعة عالخد تسيل
نتفكرك و نتفكر ضحكتك و عينيك
تبسيمتك و سنيك
نتفكر حنيتك و طيبتك
تعبك و غبينتك
نتفكر لهوتك بيا و حوفك عليا
حزنك عليا و فرحتك بيا
نتفكر الشعر لبيض و العينين الذابلين مالسهر محوقين
نتفكر صبرك الطويل و قلبك لحنين
بدنك الخايخ مالتخمام هرم قبل وقتو
نعرش علاه كل مانشد الستيلو تجي تصويرتك بين عينيا
نسمع صوتك في وذنيا
نشد تصويرتك و نبقى نبحلق فيك
نرسمك في خيالي و نشبع بيك
فيبالهم نسيتك و الضحكة الصفرا مالقلب خارجة
ميعرفوش الي غيابك مليع الجواجي
الي كل ليلة نبات نلاجي
في الورقة نحاجي
دموعي على خدي سايلة ة الروح عليك هايمة
نتخيل في الباك مغير وجودك
و في تخرجي مغير حضورك
من شكون بش نحشم كي نقلك راو عندي شكون
بش يخطبوني من عند شكون؟
و نمشي للراجلي في يد شكون؟
يواسيني و يمسح دمع عيني شكون ؟
يوصي عليا الحب و يقلو حطتها في مامو العين شكون ؟
نعرف الي عليك مش بش نهون
فيبالهم نسيتك و طويت صفحة حنيتك
فيبالهم مشيت و خليتني
فيبالهمش الي انتي بين عينيك حطيتني
تعس عليا و تنورلي ثنيتي
تخاف عليا و تحميني مالذيوبة الدايرة بيا
فيبالهم نحكي عصاحب هجرني و خلاها بيا
فيباهمش نحكي على حبيب فراقو لهيب
القلب مغيرو يتيم ، و معادش فما فرحة في العين
عايشة مغيرو جهامة بلا روح
كراسة بلا حروف...
بقلم مريم العياري
Website Design Brisbane