كبرت وعرفت

Wouroud Ben Ali - ورود بن علي

كبرت و عرفت برشا حاجات

كبرت و عرفت إلي بابا ماهوش بطل كيما مشى في بالي

عرفت إلي جارنا في الحبس مش مسافر

عرفت إلي بابا عزيزي ميت مش راقد كيما قتلي أمي

عرفت إلي قرايتي مش باش تجيلي فلوس و كراهب و ديار

عرفت إلي مش ديما الخير يغلب الشر

عرفت إلي فما برشا حاجات تخوف أكثر مالظلام

عرفت إلي أختي كانت تبكي مش عندها حساسية

عرفت إلي الغول و الهبا مهمش مخطرين كي برشا ناس

عرفت إلي العباد تكذب مش تفدلك

عرفت إلي ولد عمي سرقلي لعبتي مش خبهالي

عرفت إلي أمي مريضة مش صاحبتها الطبيبة

عرفت إلي الحلوى ماهيش كل شي

عرفت إلي بنت جيرانا و خويا كي كانوا يركشوا في الدروج ماهمش قاعدين يلعبو

عرفت لي الحرابش لي كلاهم خويا مهمش دواء

عرفت لي الطفل لي وصل أختي قدام الدار ماهوش صديقها في الدراسة

عرفت لي بابا يضرب في خويا مش يحكي معاه

كبرت و عرفت لي أنا مانيش كبير كيما مشى في بالي كبرت و عرفت برشا حاجات

بقلم ورود بن علي