الاحساس الي يجيك كي تحل عينيك نهارت عيد ميلادك و انتي ناسي الي عمرك عشرين لا لا مش ناسي اما لاهي ت و ياقف بيك الوقت لحظة و انتي تخزر في المراية انا ..

و نبقى نسال في روحي الاساْلة الوجودية متاع كيفاه العبد يفرح و يغني و يشطح و يطفي على شمعة فيها زوز ارقام 0 و 2

كيفاه نجمو نفرحو ونلمو الناس الي يحبونا و احنا فرحانين الي تزاد عام لعمرنا  و عمال نقربو للموت اكثر  كيفاه  ..

و انا واقتاه كبرت موش كنت نقرا في السنة اولى كيفاه تعداو السنين هاذي الكل شنية تعلمت  في حياتي و قداه من كتاب قريت و قداه من درس تعلمتو .. لالا موش دروس الي قريناهم في المكتب .. نحكى على الدروس متاع الدنيا الي تفيقك و ترهوجك كيفاه تنجم تخلق فيك الاحساس كينك عايش في الة زمنية و تحاول على قوة جهدك تحاول توقف الماكينة الي انتي فاها باش تاقف في 20 و ماعادش لاتقدم لا توخر

و انتي مازالت تخمم و تخزر لروحك في المراية و ترا في روحك فيلسوفة زمانك   انا مازلت نبحلق في المراية و نحاول قد منجم ننسى  و نرجع للعالم لي كنت فيه ...كل عام في حياتنا تعدى ملي انتي صغير للي كبرت و انتي تقول سايي هاني تعلمت للي يجيك صرفاق اخر يزيد يفيقك كل ماتقول هاني فقت  
صحاب ??كان نجي نحسبهم تو نغلط فما الي طلع طماع و فما لي كذاب و الرهدان و الي توفى صحبتهم معاك خاطر كانت تربطكم مكان ولا زمان ولا خدمة نهارت الي توفى توفى صحبتك معاهم ..

ولاقرايتك زعمة نجحت و فرحت امك و بوك كيما كنت تتمنى  و حياتك فرحانة بيها مقتنعة و علاقتك مع ربك كيفاه .. و لعباد تحبك و احلامك حققتهم و  امانيك وصلتلهم و بارشة ااساْلة موش في وقتهم جملة و انتي قاعدة تزين في روحك هاك الليوم معندك حتى شيبة و حتى تجاعيد تحت عينك و انتي مازلت في طمبك الصغر و العبد الي تحبو و يحبك زعمة يرضى بيك و انتي عزوزة قنقانة  و شيب في شعرك و نهار اخر كي تزيد تكبر زعمة عندك الوقت باش تذكر روحك و لا تنسى حتى نهارت عيد ميلادك زعمة كي تكبر تولي تكذب في عمرك و تنقص فيه
و كي تكبر و تولي عزوزة عمرك 70 كيفاه تنجم تحمل تعيش نهار بلاش امك و بوك  كيفاه تنجم نهار تخمم فيه و متخممش الي هوما واقفين بجنبك ... و تخمم و تخمم  كيفاه تنجم تصبر نهار اخر كي تفقدهم و ماتلقهمش بجنبك زعمة فمة الي يعوضهملك ..

بارشة اسباب تخليني نتمنى لوكان جيت نجم نوقف عمري حد ال20 و نبقى صغيرة و في دار بابا و كي نخاف نجري و نتخبى عند ماما و نمد ايدي كل يوم لبابا باش يقلي جملتو الشهيرة  خارجة هات داخلة هات اما خسارة احنا نحبو حاجة و الدنيا مكتبتلنا حاجااات