قوافي بنهودك و جواجيك تتعبد
Rania Mhamdi - رانيا المحمدينجوم ربي في الليل تسيل في خلاخل الروح
تتجمر تتململ تتخنق و تسيل في لبدن
تسيل في خطاوي لي ميراش في العتمة
لي يحس بالحفرة و بالشر لي يستنى
تسيل مع كلمة مزيانة
تزيد تسيل في مرافي لبدن وقت تتحس على شفايف الجروح
لي تتضمد بليلة تتعرى فيها النجوم و في سمانا تبرينا
تتذكر وقت كنت تقلي
الليل و تسكت
كنت تهيم و تسرح
تتململ في سكاتك و تحكي ألف كلمة ما تنطقتش
كنت نبية بشعر نصو طويل و نصو في جواجيا معري عالكل
نبية و في صلاتي ليك نكتب عربية في بلاد الصوف و الشاشية
ملايكة تكتب و تخلي وراها وصية
كنت تقول فيها
المحبة عراجن دقلة تتفرش في كل ثنية
و الثنية كتاب ما يوفاش
سطر للمحبة و من حنيتك حسبت حتى ظل الكلمة
كتاب خطاويه بالصبر مغلف
مفروش عنبر و في قوافيه وحيك وقت تسطر
ايه وحيك يا نبية عرجون محبة
يا نبية ليلي و ليل كل كتاب
يا بنية تتشعبط في شجرة بونا أدم و حواء
يا غلطة مزيانة و غصة تتعرى في نصف نص و تتحجب في روح النشوة
يا ريحة الورد في بلادي يتقطر
يا فل مزهر في بيت كل عربي
يا جواجي محفورة بكنيسة الرب
يا دلال ذابل في نص الحلق
يا خلاخل الروح
يا نجوم ربي
يا كاوية لحروف بسكات كلو كاوي
يا نار كلها طافية
يا برد كلو شاعل
يا حرف ما يوفاش
يا سماء رب
يا صوت لمحبة
يا روح نابتة في كل فرحة
رانيا المحمدي
Website Design Brisbane