حل الصرة تلقى خيط... المرة هاذي جات عالحيط...

المرة اللي فاتت زادة... اانت ساكتة وهو نادى...

المرة اللي فاتت زادة طلعك للسماء... وهبطك علىىى راسك وانت مش شاربة دواء...

غمض عينيك واسمع الصوت... هو مكذبش عليك اما انت على الحكايات لفارغة تموت...

وهو حكاياتو فارغة... وانت عليه مت وفنيت...

ذبت في غزرة عينيه... والضحكة كيف يبانو سنيه... وال

chemise

الزرقة اللي تغطي شطر ايديه...

وانت فيه مت وحييت... مشيت وجيت... عليه غنايات غنيت... دعيت لربي وصليت... بكيت... لصحابك عليه حكيت... مرضت... شكيت... في اللخر عييت...

قلت يزيني... علاه هكة الدموع هاربة من عيني...

علاه نقدم ونوخر... وساقيَ في بلاصتي شاديني...

علاه مانجمش ناخو موقف ونقلو لا...

شبيه ربي باليني بيه بلاء...

كان ربي هزو.. راني توة نقبل فالعزاء...

ووووه اللطف... في راسي ولا في راسو..

كاسي فارغة ونشرب من كاسو...

نشيخ على حكاياتو وناسو...

وشفايفو اللي عمرهم خدي ماباسو...

ويديا اللي عمرهم ماجاوو على قياسو...

وصوتو الخشين وهاكالشعر اللي مزينلو راسو...

شاهية يغنيلي غناية... شاهية نتبادلو لهداية... شاهية نكتب اني وياه نفس لحكاية... نحب في الشيب اللي في شعري والصغار اللي يلعبوا حذايا... نهار كي ناقف اني وياه قدام لمراية...