حبيت نحكيلكم على التونسية الحرة . التونسية الي لا تجي كيفها لا فرنسية و لا ايطالية .التونسية الحرة الي طول عمرها تحلم بقصة حب مضخمة .

ماراتش كيفها لا في تلفزة و لا في سينما و لا حتى في قصة . التونسية الي تلوج على الحب تفركس و تبربش باش في ليخر تلقاه يضحكلها ضحكة و يعلقها بكلمة .

هو عامل فيها يحبها و هي ماشي في بالها تحبو . و كيما اي قصة بداياتها مزيانة كلها نور و نوار . قصة فائحة بريحة الازهار .

زوز عصيفرات ما حلاهم دنيتهم هي جنتهم . و بشوية و بشوية هاك جنة تغيب و تزيد تغيب و ما يبقا منها كان القصة .

بالطبيعة بالنسبة ليه النفحة طارت و القلق عمالو عينيه يحب يبدل . يحب روحو كي نحلة من زهرة لزهرة . و بالنسبة ليها دنيا بعدو ظلام  اما حتى هاك الظلام طلع كي سي وخينة يحب روحو من زهرة لزهرة .

و تجي عايلتها و يجيبولها واحد لا تعرفو لا يعرفها  يقوللها هذا خطيبك . ما تعرش تفرح و الا تحزن .

و علاش مش تحزن . في ليخر ولات خطيبة حد . كل شيء يهون قدام انها تكون خطيبة .

و نسات قصة الحب المضخمة و فاقت من الحلمة . باش تلقى روحها مرة اخرى تونسية حرة