عندي قريب العام ما كتبتش .. قريب العام ماحررتش حروفي ،ماسخنتش ورقتي و مافرغتش بلومتي .... قريب العام ما كتبتش! ماخربشتش ما فسختش ما شطبتش و ماقطعتش الأوراق و عاودت من جديد ... قريب العام أوراقي متتركنة.. باردة ..بلومتي جامدة..الحروف في مخي مبعثرة و كلماتي ضايعة .

عندي قريب العام ماعادش نعرف روحي، ضعت ..النفس تقطع مع آخر مرة كتبت فيها.. من آخر مرة سكرت البلومة و خبيت الكراسة... من وقتها ماعاودتش عرفت روحي . نحسب في الأيامات لي ما خربشتش فيهم .. باردين ..أيامات ضايعين من حياتي. قريب العام حاسة روحي فارغة منغير أوراق على البيرو.. توحشت نسيب روحي على وراقي... توحشت نسب و نحب و نتكب على أوراقي و نمسخ يديا بالحبار وقت لي نفرغ الخنار ...

قريب العام ماقمتش نص الليل نجري للبيور و عينيا بالنوم خاطر جا على بالي نص.. و ماسهرتش الليالي نزين في الكلمات لين طلع عليا الصباح ... قريب العام ما جريتش باش نوصل فيسع نكتب الفكرة لي جاتني و آنا في طريقي للليسي و نبقى نتمتم ونعاودها نعاود ونعاود باش تتحفر في مخي و ماننساهاش .... قريب العام مافرحتش و خرجت نصي : ب وجبعتو، بفرحتو، بقوتو.... نصي لي يتولد مني في نصاص الليالي ببرشا وجيعة و برشا حب.

قريب العام حسيت حاجة تفكت مني.. أعز ماعندي...تقول ضيعت بنتي .. قتلت بنتي ! يوجعني قلبي كل ما نرى وراقي مرمية على الطاولة ، نتوجع كل مانحل قجر البيرو و نرى بلومتي متتركنة و مخزنة الحبار تستنى قريب العام !

النفس تقطع، الكلام قلل و دلل ، فقدت شاهية كل شيء، عفت روحي خاطر ضيعت حروفي و أنا لي ماكنت نتنفس كان لما نكتب.. وما نفدلك و نشيخ كان كيف نلعب حروفي و نفرح وريقاتي .. و ما نحب كان كيف نكتب، آنا ما نحب كان كيف نجبد عليك بيني وبين أوراقي " الشكوى لغير هالوريقات مذلة " .. ما نجمش نحبك و آنا عاجزة إني نكتب ! ... تذليت منغير كتيبة، منغير حروفي و كلماتي.. نبكي كيف نقرى نصوص قديمة حبارها بلاح و كلاتها الغبرة ....

ضياع و رعب ! ياخوفي تنفرني أوراقي كيف نرجع نشكي من جديد و بلومتي تنكر فيا و تذلني و تقتلني .. نخسر كل شيء آنا إلا حروفي و وجيعة كلماتي ! آنا ندفع شطر عمري .. عمري الكلو باش يتولد نصي و يكبر .. يكبر و يعيش باش كيف نعاود نقراه نعرف لي آنا مازلت عايشة ! نعرف لي هيام مازالت عايشة خاطر مازالت تكتب.. حافظت على الحروف و مازالت تكتب... تكتب باش تتنفس و تعيش و باش كيف تواجه الموت تقلو : تريث قليلا أيها الموت إني أكتب .