قبل كنت ما نعرفش.. لا عرفني الحب ولا عرفتو، لا زارني ولا زرتو، ياخي تلفني كيما تلفتو.. ومرة مالمرات دق الباب، دخل علي يتبختر بالمشيات، يقدملي في روحو ويعطيني في الصفات، يرويلي في القصص والحكايات و يحكيلي على روميو وجوليات والي عشق وعشق حتى لين مات ...

جبدني كلامو وجذبني ليه حس بيا وحسيت بيه وروحي سمعتو حتى آمنت وذابت فيه... كبر الحب وكبرت معاه وولينا صحاب وحباب وكي نستحقو نلقاه... حبيتو وصدقتو،عشت بيه وطبقتو  وفي روحي عطيتو وقتو والكره طلقتو...

وما ننساش كي عرفني بأختو المحبة وقلي استحفظ عليها خاتر لازم عمرها ما تتخبى،تسكن معاك ومنها تتغذى،وفي وسطك تكبر وتتربى...زدت كبرت بيهم الاثنين،يمشيو معايا في كل خطوة وكي نتلفت عاليسار وعاليمين،خبيتهم عندي وسكنتهم ممو العين...الحب والمحبة خوات اما مش توامة،يخليوك اطير وتعلي كي الحمامة وبلاش بيهم العباد محرومين ويتاما.