قباحة
Amen Rezgui - أمان الرزقييا تجيني يا نجيك ,,يا نتقابلو في شطر الثنية
شيطانك يعرف الدّار ,, و انت تعرف لبقيّة
إيجى نفرشلك عمري ريش ,, ما يجيش ,, الملايكة عالأرض ما تمشيش
أدخل بساقك اليسار ,, اليمين يهزّ للجنّة و الجنّة ما فيها بنّة ,,
نحبّك نار ,, تاكل الجواجي و تدّفى بجماجم الأفكار
اتّكى ,,
نبنيلك في قلبي مكّة
و نحرّم الحجّة ليك ,,
نفرّش عمري سجّادة و نحطّ القبلة عينيك
نسجدلك من غير ركوع
و نصوملك عمري و شويّة .. دخّلني نارك و انساني ,, ذنبي و عملتو بيديا
و انت راقد بحذايا ورّيني وجهي في مرايا ,, و تبّع الشّامة وين
حلّ على ضفيرتي العقدة ,, وحلّيلي في الجنّة ذراع ,,
فرّت في شعري عفاريتك ,, و لمّ فتاتي مالقاع
وشوشلي ..
كلمة بالكلمة
حكايات العمر اللي ضاع
إكتبني على سطورك كلمة
لا قبلي ولا بعدي جملة
انساني على وسادتك حلمة
و اسرقلي من ليلك نجمة ,,
قرّيني حروفك و كلامك ,,و علّمني ننطق مليح
صوّرلي لبدنك خريطة
نقطّعها في ليالي ظلامك و نسافر وحدي ,, و نضيع
الضيعة في ربوعك بنّة ,, و النّومة على ترابك ,, ريش
شيطانك ,, في الظلمة قبيح
لا عندو دين و لا ملّة
يلعب و ينقّز عالشفة .. و صوابعك تبّع في الجرّة
و الشفة ترعش بردانة ,, ورقة هاززها ريح
لمفرّت عالرّقبة لمّو و كتّف شيطانك لا يطيح
لا عندي حول و لا قوّة
ولا عروق تثبتني مليح
بقلم
أمان الرزقي
Website Design Brisbane