تو وين عرفت شنية معناها تحب انسان ما يحبكش... تو وين عرفت  شمعناها انسان مستعد يفدي روحو على خاطرك منغير تخمام، أما المشكل في اللي الشيئ هذا يتعاش من طرف واحد... تو وين عرفت و حسيت... أول مرة نلوم روحي على كل دقيقة لمتك فيها ولا تحسرت و قلت فيها علاه ؟ أول مرة نبكي و أنا فاهمة علاش بالضبط نبكي في وجيعتي منك...

تو وين عرفت و فهمت شمعناها ترضى و تصبر و تحاول مع انسان تحبو و ما يحبكش...

تو وين عرفت شمعناها تعيش في كذبة في شكل حلمة... و تو وين عرفت اللي بالحق المرة هاذي لازم نفيق و نخرج منها... باللي تكون وجيعتها و باللي يكون اللي بش يصير من بعدها...
كي تحس اللي المجهودات الكل فارغة في فارغة و اللي الانسان هذاكا ما يحبكش...

تحب... معناها تفني روحك... تهتم بأصغر أصغر أصغر التفاصيل... تحب يعني تلوج على اللي تحبو... تستناه... تقلق كي يقلق و حتى تحس بيه من غير ما يقلك... تحب يعني ترى الدمعة اللي وراء الضحكة...

كي تلقى انسان عايش معاك نفس الحالة اللي عايشها انتي و تلقى روحك ما تنجم تعمل شيئ وقتها وين تفهم روحك، تعرف بلاصتك و الحالة اللي انتي عايشها...

اييييييه... يا دنيا... قداش تمشي بالعكس...

كي تلقى روحك معيش غيرك في عذاب انتي بيدك عايش فيه و تتشفع منو.. أما منغير ما تقصد....

برشا حاجات تتحس في نفس الوقت... قلبك يوجعك... يعصر عليك... تحس بالذنب... تفرح... تبكي.... تضحك....

تقول هاو نتحب حتى أنا... و نوجع زادة... أما ما نقصدش.... وقتها تقول... أنا زادة نحبو و هو يوجع فيا أما بالك هو كيفي أنا مع غيري، ما يقصدش... تولي تفهم وقتها اللي هو ما حبكش و اللي مش غلطتو...

ينجم يكون حاول و ما نجمش...

و من كثرة ما انتي عافسة ع الجمرة تحاول قد ما تنجم ما توجعش غيرك باللي واجعك...

غيرك اللي ترى روحك و حكايتك فيه...

تفيق و تعرف اللي فما حاجات مش بيدينا و ما نتحكموش فيها و تأكد انو باللي يصير لازم تبعد و ما تفرضش روحك ع اللي ما يحبكش و حتى لو كان ماهوش رافضك....

قابلك أما ما يحبكش...