ﺍﻟﻤﺤﺒﺔ ﺍﻟﻜﺒﻴﺮﺓ ﻣﺎﺗﻨﺠﻢ ﺗﺨﻠﻒ ﻛﺎﻥ ﺍﻟﻮﺟﻴﻌﺔ ﺍﻟﻜﺒﻴﺮﺓ ..

ﻭ ﺃﻧﺎ ﻭﺟﻴﻌﺘﻲ ﻛﺎﻧﺖ ﻛﺒﻴﺮﺓ .. ﻭ ﺟﺮﺣﻲ ﺃﻛﺒﺮ .. ﺟﺮﺡ ﺑﻼﺵ ﺩﻡ ﻭ ﺑﻼﺵ ﺗﺮﺍﺱ .. ﺟﺮﺡ ﻣﺎﻳﺘﺮﺍﺵ ﺃﻣﺎ ﻧﺤﺲ ﺑﻴﻪ .. ﻧﺤﺲ ﺑﻴﻪ ﻛﺎﻥ ﺃﻧﺎ ﻭ ﻣﺎﻳﺤﺲ ﺑﻴﻪ ﺣﺘﻰ ﺣﺪ ﺍﺧﺮ ﻣﻌﺎﻳﺎ ﻭ ﻟﻮ ﻧﺤﻜﻲ ﺳﻨﻴﻦ ﺃﺧﺮﻳﻦ ..

ﺟﺮﺡ ﻟﺪﺍﺧﻞ .. ﺟﺮﺡ ﻭ ﺭﺷﻴﺖ ﻋﻠﻴﻪ ﺍﻟﻤﻠﺢ .. ﺟﺮﺡ ﻳﺠﻴﻪ ﻧﻬﺎﺭ ﻭ ﻳﺒﺮﻯ ﺃﻣﺎ ﺑﺎﺵ ﻳﺨﻠﻲ ﺳﻴﻜﺎﺗﺮﻳﺲ ﻛﻴﻤﺎ ﺍﻟﺨﺒﺶ ﺍﻟﻤﺰﻳﺎﻥ ﺍﻟﻲ ﻓﻲ ﻳﺪﻱ .. ﺍﻟﻠﻮﻝ ﻧﺤﺲ ﺑﻴﻪ ﻛﺎﻥ ﺃﻧﺎ ﻭ ﺍﻟﺜﺎﻧﻲ ﻧﺸﻮﻓﻮ ﻛﺎﻥ ﺃﻧﺎ ..

ﻭﺟﻴﻌﺔ ﻣﺎﻧﻌﺮﻓﺶ ﻭﻗﺘﺎﺵ ﺑﺪﺍﺕ ﺑﺎﻟﻀﺒﻂ ﺃﻣﺎ ﻧﻌﺮﻑ ﺍﻟﻲ ﻫﻲ ﺑﺎﺵ ﺗﺨﺮﺟﻨﻲ ﻣﺎﻟﻈﻼﻡ ﺍﻟﻲ ﻛﻨﺖ ﻓﻴﻪ .. ﻫﻲ ﺍﻟﻲ ﻓﻴﻘﺘﻨﻲ ﻋﻠﻰ ﺭﻭﺣﻲ ﻭ ﻛﻞ ﻣﺎﺗﺰﻳﺪ ﺗﺮﺵ ﺍﻟﻤﻠﺢ ﻭ ﺗﻘﻮﻱ ﺍﻟﻮﺟﻴﻌﺔ ﻛﻞ ﻣﺎ ﺍﻟﻌﻘﻞ ﻳﺰﻳﺪ ﻳﺨﺪﻡ ﻭ ﺍﻟﻘﻠﺐ ﻳﻔﻴﻖ ﻋﻠﻰ ﺭﻭﺣﻮﺍ ﻫﺬﺍﻛﺎ ﺍﻟﻲ ﺧﻤﻤﺖ ﻓﻲ ﺍﻷﺭﺗﻴﻜﻞ ﺍﻟﻘﺪﻳﻢ ﻧﺘﺒﻌﻮﺍ ﻭ ﻧﻤﺸﻴﻠﻮﺍ ﺑﻬﻮﺍﻩ ﺃﻣﺎ ﺑﺼﺮﺍﺣﺔ ﻣﺎﻧﻴﺶ ﻣﺘﺎﻉ ﺗﻤﺮﻣﻴﺪ .. ﻳﺰﻱ ﻣﺎﻟﻲ ﻓﺎﺕ ﻭ ﺗﻌﺪﻯ ..

ﺃﻣﺎ ﺃﻧﺎ ﻭﺟﻴﻌﺘﻲ ﺳﺒﻴﺴﻴﺎﻝ ﻋﻠﻰ ﻭﺟﺎﻳﻊ ﺑﻘﻴﺔ ﺍﻟﻲ ﺣﺒﻮﺍ .. ﺍﻟﻲ ﺣﺒﻮﺍ ﻭ ﺣﻠﻤﻮﺍ ﻛﻴﻔﻲ .. ﺍﻟﻲ ﺣﺒﻮﺍ ﻭ ﻓﺮﺣﻮﺍ .. ﺍﻟﻲ ﺣﺒﻮﺍ ﻭ ﺗﻤﻨﺎﻭﺍ .. ﺍﻟﻲ ﺣﺒﻮﺍ ﻭ ﻫﺰﻭﺍ ﻳﺪﻳﻬﻢ ﻟﺮﺑﻲ ﻭ ﺩﻋﺎﻭﺍ ..

ﻭﺟﻴﻌﺘﻲ ﺳﺒﻴﺴﻴﺎﻝ ﻋﻠﻴﻬﻢ .. ﺗﻌﺮﻓﺶ ﻋﻼﺵ ؟ ﺳﺒﻴﺴﻴﺎﻝ ﺧﺎﻃﺮ ﺃﺻﺤﺎﺑﻲ ﻛﻴﻒ ﻳﺤﻜﻴﻮﻟﻲ ﻋﻠﻰ ﺣﻜﺎﻳﺎﺗﻬﻢ ﻭ ﻳﺤﺒﻮﺍ ﻳﻘﺎﺭﻧﻮﺍ ﺭﻭﺍﺣﻬﻢ ﺑﻴﻨﺎ ﻧﻘﻠﻬﻢ ﺗﻐﻠﻄﻮﺍ ﺃﺣﻨﺎ ﻣﺎﻧﺘﻘﺎﺭﻧﻮﺍ ﺑﺤﺪ .. ﺃﺣﻨﺎ ﻣﺎﻛﻴﻔﻨﺎ ﺣﺪ ﻭ ﻣﺤﺒﺘﻨﺎ ﻣﺎﻋﺎﺷﻬﺎ ﺣﺪ ﻭ ﻣﺎﻳﻌﻴﺸﻬﺎ ﺣﺪ ..

ﺃﺣﻨﺎ ﻭﺭﺩﺗﻴﻦ ﻓﻲ ﺟﻨﺔ .. ﺃﺣﻨﺎ ﺍﻟﻲ ﺣﻴﻴﻨﺎ ﻣﻊ ﺑﻌﻀﻨﺎ ﻭ ﺑﺪﻳﻨﺎ ﻣﻊ ﺑﻌﻀﻨﺎ ﺃﻣﺎ ﻣﺎﻛﻤﻠﻨﺎﺵ ﻣﻊ ﺑﻌﻀﻨﺎ ..

ﻭﺟﻴﻌﺘﻲ ﻣﺒﺪﻟﺔ ﻋﻠﻰ ﺍﻟﻨﺎﺱ .. ﺃﻧﺎ ﺍﻟﻲ ﺣﺴﺒﺘﻚ ﻧﻮﺭ ﻟﻌﻴﻨﺎﻳﺎ .. ﺃﻧﺎ ﺍﻟﻲ ﺣﺴﺒﺘﻚ ﺭﺍﺟﻠﻲ ﻭ ﺧﻮﻳﺎ .. ﺣﺴﺒﺘﻚ ﻋﻤﺮﻱ .. ﻧﻬﺎﺭﻱ ﻭ ﻟﻴﺎﻟﻴﺎ .. ﻓﻲ ﻧﻨﻬﺎﺭ ﻛﻨﺘﻠﻲ ﺍﻟﺮﻓﻴﻖ ﻭ ﺍﻟﺼﺎﺣﺐ ﻭ ﺍﻟﺤﺒﻴﺐ .. ﻓﻲ ﻧﻬﺎﺭ ﻛﻨﺘﻠﻲ ﺍﻟﺮﺍﺟﻞ ﺍﻟﺼﻨﺪﻳﺪ ﺍﻟﻲ ﻧﺤﻂ ﺭﺍﺳﻲ ﻋﻠﻰ ﺻﺪﺭﻭﺍ ﻭ ﺃﻧﺎ ﻣﺘﻬﻨﻴﺔ ﻭ ﺃﻧﺎ ﻣﻄﻤﺎﻧﺔ ﻭ ﻣﺮﺗﺎﺣﺔ ﻭ ﻋﺎﺭﻓﺔ ﺍﻟﻲ ﻣﻌﺎﻙ ﺍﻧﺖ ﻭ ﺑﻴﻦ ﻳﺪﻳﻚ ﺍﻧﺖ ﺍﻟﺪﻧﻴﺎ ﺯﺍﻫﻴﺔ ﻭ ﻣﻬﻤﺎ ﻛﺎﻥ ﻳﻜﻮﻥ ﻣﺎﻳﻘﻠﻘﻨﻲ ﺷﻲﺀ ﻭ ﻣﺎ ﻳﻮﺗﺮﻧﻲ ﺷﻲﺀ ﻣﺎﺩﺍﻣﻨﻲ ﺑﻴﻦ ﻳﺪﻳﻚ ﻭ ﻋﻴﻨﺎﻳﺎ ﻓﻲ ﻋﻴﻨﻴﻚ ﻭ ﻳﺪﻳﺎ ﻣﻜﺒﺸﺔ ﻓﻲ ﻳﺪﻳﻚ ..

ﺃﻧﺎ ﺍﻟﻲ ﺣﺒﻴﺘﻚ .. ﺃﻧﺎ ﺍﻟﻲ ﺗﻤﻨﻴﺘﻚ .. ﺃﻧﺎ ﺍﻟﻲ ﺗﻤﻨﻴﺘﻚ ﺑﺠﻨﺒﻲ ﻓﻲ ﺍﻟﺘﺼﺪﻳﺮﺓ .. ﺃﻧﺎ ﺍﻟﻲ ﺗﻤﻨﻴﺘﻚ ﺳﻨﺪﻱ ﻭ ﺫﺭﺍﻋﻲ .. ﺃﻧﺎ ﺍﻟﻲ ﺗﻤﻨﻴﺖ ﻧﻌﻠﻲ ﺻﻮﺗﻲ ﻭ ﻧﻘﻮﻝ ﻧﺤﺒﻮ ﻗﺪﺍﻡ ﺍﻟﻨﺎﺱ ﺍﻟﻜﻞ ﻭ ﻓﻲ ﻭﺳﻄﻬﻢ ﺃﻣﺎ ﺍﻧﺖ ﺑﺎﺵ ﻛﺎﻓﻴﺘﻨﻲ ؟ ﺑﺎﻟﻜﺬﺏ .. ؟ ﺑﺎﻟﻨﻔﺎﻕ؟ ﺑﺎﻟﻐﺪﺭ ؟ .. ﺑﺎﻟﺨﻴﺎﻧﺔ .. ؟ ﺑﺎﻟﻮﺟﻴﻌﺔ .. ؟ ﺑﺎﻟﻨﻜﺮﺍﻥ ﻭ ﺍﻟﻬﺠﺮﺍﻥ ؟ ..

ﻗﺘﻠﻲ ﻧﺤﺒﻚ ﺩﻳﻤﺎ " ﺩﻳﻤﺎ ﻣﺎﺗﻮﻓﺎﺵ " .. ﻳﻠﻌﻦ ﺑﻮﻫﺎ ﺩﻳﻤﺎ ﻣﺘﺎﻋﻚ ..

ﺍﻟﻤﺤﺒﺔ ﺗﺪﻭﻡ ﻭ ﺗﻌﻴﺶ ﻭ ﻫﺎﺫﻱ ﺣﺎﺟﺔ ﺍﻣﻨﺖ ﺑﻴﻬﺎ ﻣﻌﺎﻙ ﻭ ﺗﻮ ﻛﻔﺮﺕ ﺑﻴﻬﺎ .. ﻣﺎﻳﺪﻭﻡ ﺷﻲﺀ ﻓﻲ ﺍﻟﺪﻧﻴﺎ ﻳﻜﺬﺏ ﻋﻠﻴﻚ .. ﺣﺘﻰ ﺭﻭﺣﻚ ﻧﻬﺎﺭ ﺍﺧﺮ ﺑﺎﺵ ﺗﻄﻠﻊ ﻭ ﺗﺨﻠﻲ ﺑﺪﻧﻚ ..

ﻣﺎﻧﺤﺒﺶ ﻧﻜﺘﺐ ﻭ ﻧﻘﻮﻝ ﻧﺴﻴﺘﻚ ﻭ ﻣﻦ ﺑﺎﻟﻲ ﻧﺤﻴﺘﻚ .. ﻣﺎﻧﺤﺒﺶ ﻧﻜﺘﺐ ﻭ ﻧﻘﻮﻝ ﺣﻜﺎﻳﺔ ﻭ ﻭﻓﺎﺕ .. ﻧﻜﺮﻩ ﺍﻟﻜﺬﺏ ﺍﻟﻲ ﻋﺒﻴﺖ ﻣﻨﻮ ﺷﻜﺎﻳﺮ ﻣﻌﺎﻙ .. ﻣﺎﺯﻟﺖ ﻧﺤﺒﻚ ﻭ ﻣﺎﺯﺍﻝ ﺟﺮﺣﻚ ﻣﺤﻠﻮﻝ .. ﻭ ﻣﺎﻧﺴﻴﺘﺶ ..

ﻣﺎﻧﺴﻴﺘﺶ ﺃﻭﻝ ﻣﺮﺓ ﺷﺪﻳﺘﻠﻲ ﻓﻴﻬﺎ ﻳﺪﻱ ﻭﻻ ﺃﻭﻝ ﻣﺮﺓ ﺑﺴﺘﻨﻲ ﻭﻻ ﺃﻭﻝ ﻣﺮﺓ ﻋﻨﻘﺘﻨﻲ ﻭ ﻻ ﺃﻭﻝ ﻣﺮﺓ ﻗﺘﻠﻲ ﻧﺤﺒﻚ .. ﻣﺎﻧﺴﻴﺘﺶ ﺃﻭﻝ ﻣﺮﺓ ﻛﻴﻒ ﺗﻼﻗﻴﻨﺎ ﻭ ﺃﻭﻝ ﻣﻴﺴﺎﺝ ﺑﻴﻪ ﺣﻴﻴﻨﺎ ﻭ ﺃﻭﻝ ﻗﻌﺪﺓ ﻭ ﺍﺵ ﻓﻴﻬﺎ ﺣﻜﻴﻨﺎ ﻣﺎﻧﺴﻴﺘﺶ ﻭ ﻧﻜﺬﺏ ﻛﺎﻥ ﻧﻘﻮﻝ ﻧﺴﻴﺖ ..

ﻣﺎﻧﺴﻴﺘﺶ ﺃﻭﻝ ﻣﺮﺓ ﻗﺮﻳﺖ ﻓﻴﻬﺎ ﻛﺘﻴﺒﺘﻲ ﻭ ﺷﻨﻮﺓ ﻗﺘﻠﻲ .. ﻣﺎﻧﺴﻴﺘﺶ ﺃﻭﻝ ﻣﺮﺓ ﻛﺘﺒﺘﻠﻲ ﻓﻴﻬﺎ .. ﺃﺣﻨﺎ ﺍﻟﻲ ﻛﺘﺒﻨﺎ ﻣﻊ ﺑﻌﻀﻨﺎ ﻭ ﻟﺒﻌﻀﻨﺎ ..

ﺃﻧﺎ ﺍﻟﻲ ﻛﺘﺒﺖ ﻋﻠﻴﻚ ﻣﺮﺓ ﻓﻲ ﻣﺮﺓ .. ﻭ ﻛﻨﺖ ﺍﻱ ﻛﻠﻤﺔ ﻧﻜﺘﺒﻬﺎ ﺍﻧﺖ ﺃﻭﻝ ﻭﺍﺣﺪ ﺗﻘﺮﺍﻫﺎ .. ﻭ ﺗﻮ ﺑﻘﻴﺖ ﻧﻜﺘﺐ ﻟﻴﻚ ﻭ ﻋﻠﻴﻚ ﺃﻣﺎ ﻛﺘﻴﺒﺘﻲ ﻧﺨﺒﻴﻬﺎ ﻭ ﻧﻘﺮﺍﻫﺎ ﻛﺎﻥ ﺃﻧﺎ .. ﺗﻮ ﺑﻌﺪ ﻣﺎﻧﻜﻤﻞ ﻧﻜﺘﺒﻠﻚ ﻭ ﻧﺤﻜﻴﻠﻚ ﻭ ﻧﺸﻜﻴﻠﻚ ﻧﺒﻜﻲ ﺑﻐﺼﺘﻲ ﻭ ﻧﺘﻔﻜﺮﻙ ﻛﻴﻔﺎﻩ ﺗﻘﻠﻲ ﺭﺍﻙ ﻣﻌﻠﻤﺔ ﻳﺎ ﻧﺴﺎﻳﺔ .. ﻳﺎ ﻧﺴﺎﻳﺘﻲ ..

ﻭ ﻣﺎﻧﻮﺻﻞ ﻧﻘﻮﻝ " ﻧﺴﻴﺖ " ﻛﺎﻥ ﻭ ﺃﻧﺎ ﻣﺘﺄﻛﺪﺓ ﺑﺎﻟﻲ ﺃﻧﺎ ﻧﺴﻴﺖ ﻭ ﻭﻗﺖ ﺗﺘﻌﺪﻯ ﻣﻦ ﺣﺬﺍﻳﺎ ﻣﺎﻧﺤﺲ ﺷﻲﺀ .. ﻻ ﻗﻠﺒﻲ ﻳﺪﻕ ﻭ ﻻ ﻳﺪﻳﺎ ﺗﺮﻋﺶ .. ﻭ ﻛﻴﻒ ﺗﺤﺰﻥ ﻭﻻ ﺗﺘﻘﻠﻖ ﻣﺎﻧﺤﺴﺶ ﺑﻴﻚ ﻭ ﻛﻴﻒ ﻳﺼﻴﺮ ﻣﻌﺎﻙ ﺍﻟﻲ ﻳﺼﻴﺮ ﻣﺎﻳﻬﻤﻨﻴﺶ ﻓﻴﻚ ﺃﻣﺎ ﺗﻮ ﻣﺎﺯﺍﻝ ﻳﻤﻬﻨﻲ ﻓﻴﻚ .. ﻣﺎﺯﺍﻝ ﺍﻟﻨﺴﻴﺎﻥ ﺃﻣﺎ ﻣﺎﻋﺎﺩﺵ ﺑﻌﻴﺪ ..

ﻭ ﻛﻞ ﺷﻲﺀ ﻋﺸﻨﺎﻩ ﻭ ﺣﻜﻴﻨﺎﻩ ﻭ ﺣﺴﻴﻨﺎﻩ ﻣﺸﻰ ﻣﻊ ﺧﺒﺮ " ﻛﺎﻥ " ﻭ ﺍﻟﻲ ﺗﻜﺴﺮ ﺯﻋﻤﻰ ﻳﺘﺼﻠﺢ ؟ ..

ﺃﻣﺎ ﺃﻫﻢ ﺣﺎﺟﺔ ﺍﻧﻲ ﻣﺎﻧﻴﺶ ﻧﺎﺩﻣﺔ ﻭ ﻣﺎﻧﻴﺶ ﺑﺎﺵ ﻧﻨﺪﻡ .. ﺧﺎﻃﺮ ﺃﻧﺎ ﺍﻟﻲ ﺣﺒﻴﺖ ﻭ ﺻﻨﺖ ﻭ ﻋﺸﻘﺖ ..

ﺃﻧﺎ ﺍﻟﻲ ﻻ ﻛﺬﺑﺖ ﻭﻻ ﻏﺪﺭﺕ .. ﺃﻧﺎ ﺍﻟﻲ ﺻﻠﺤﺖ ﻭ ﻃﻴﺤﺖ ﻣﻦ ﺭﻭﺣﻲ ﻣﺮﺓ ﻭ ﺍﺛﻨﻴﻦ ﻭ ﻣﺎﻧﻴﺶ ﺑﺎﺵ ﻧﻨﺪﻡ .. ﺃﻧﺎ ﺍﻟﻲ ﻻﺧﺮﻟﺤﻈﺔ ﺑﻘﻰ ﻋﻨﺪﻱ ﺃﻣﻞ ﻓﻴﻚ ﻭ ﻓﻲ ﻣﺤﺒﺘﻲ ﻟﻴﻚ .. ﺃﻧﺎ ﺍﻟﻲ ﻻﺧﺮ ﻟﺤﻈﺔ ﻗﻠﺖ ﻳﺤﺒﻨﻲ ﻭ ﻣﺎﻳﺨﻠﻨﻴﺶ ﻭ ﺗﻮ ﻫﺰﻳﺖ ﻳﺪﺍﻳﺎ ﻣﻨﻚ ﻭ ﺯﺩﺕ ﻋﻠﻰ ﺍﻟﺠﺮﺡ ﺟﺮﺣﻴﻦ ..

ﻭ ﺍﻧﺖ ﺍﻟﻲ ﺧﻨﺘﻨﻲ ﻭ ﻣﺎ ﺻﻨﺘﻨﻲ .. ﺍﻟﻲ ﻣﺸﻴﺖ ﻭ ﺧﻠﻴﺘﻨﻲ ﻭ ﺗﺮﻛﺘﻨﻲ .. ﺍﻧﺖ ﺍﻟﻲ ﻣﺎﻋﻄﻴﺘﺶ ﺍﻟﺜﻘﺔ ﻻ ﻟﻴﺎ ﻻ ﻣﺤﺒﺘﻚ ﻓﻴﺎ .. ﺍﻧﺖ ﺍﻟﻲ ﺑﻌﺘﻨﻲ ﻭ ﻟﻴﻌﺘﻨﻲ ..

ﻭ ﻣﺎﻧﺴﻴﺘﺶ ﻭ ﻣﺎﻧﺴﻴﺘﺶ ﻭ ﻣﺎﻧﻨﺴﺎﺵ ﺍﻟﻮﺟﻴﻌﺔ .. ﻭ ﻣﺎﻧﻨﺴﺎﺵ ﺍﻟﻲ ﻓﺎﺕ ﻭ ﺍﻟﺬﻛﺮﻳﺎﺕ .. ﻣﺎﻧﻨﺴﺎﺵ ﻻ ﺍﻟﺒﺎﻫﻲ ﻻ ﺍﻟﺨﺎﻳﺐ ﻭ ﻣﺎﻧﻨﺴﺎﺵ ..

ﻭ ﻳﺎﺟﺒﻞ ﻣﺎﻳﻬﺰﻙ ﺭﻳﺢ ..