مش أول مرة نشوف لبحر ..  ولا أول  مرة نشوف صنارة و شفر ..و محلاها الليلة السماء من غير قمر...  عيني موالفة السهر..

الليلة أنا نكتب و حبيبي يشعر ..  من غير كلام يعبر ... يزين في حياتي و بيديه الفرحة يصور..

أول مرة البحر يغازلني ... بأمواجو يداعبني ... منو النجوم تغار تبوسني تعنقني ...

أول مرة طول الوقت ما قلقني .. ولزيادة منو شوقني ... عشيري بجانبي و الموزيكا تطربني ...

حاسة بقلبو يحب يفرحني ... كيف غزرلي من عينيه العسل ذوقني ...قلبي بالقوي يدق ،قلبي الليلة من بعضي فتقني...

من حبك ما تعتقني ... خليني نعشش في قلبك  .. إجبدني ،لصقني ...وبين ضلوعك قول تعشقني ...  

زيد قربني.. خليني نشم ريحتك تفرشكني .. تهزني ،تجيبني ، إدخلني بعضي تمهمشني ..

خليني هايجة ما تركحني ..

أول مرة صوت عبد الوهاب يعجبني ... والريح ما يمرجني.. و نسمة الليل ما تقرسني..

نذوب أنا كان عينو غمزتني..

قبل ما نوصل يجبدني .. منو يقربني ... يغزر في عيني يغرقني ... نتنهد كي يشوقني..

أول مرة نسمع من غير ما يكلمني ... نفهم من غير ما يفهمني ... بيه و معاه يطيرني.... حالف باش كل لحظة يفرحني ..

بين جوانحو يسكني ..

زعمة كفرت كي سميتو خالقني ..

وكان كفرت بالوصف .. ربي وحدو يحاسبني ...

أنا الجازية لهلالية  و هو لي يعشقني