في حلمتك عيش ...
Houyem Mannai - هيام المناعي يجيك وقت يضيق بيك الحال
و للحظات لي بكيتهم يرجعوا للبال....
الناس لي حبيتهم ..
و حتى لي خيتهم..
وإل نسيتهم....تي حتى لي تحب تنساهم ...
هاكا اللحظات لي تعيشهم تولي تتمنا لو كان تمحاهم.
فييجيك وقت وقت لي الناس الكل تدور عليك...وقت تحس لي كل شيء ضاع من بين يديك....
ما لقيت حد يهنيك ...على صدرو تبكي و ينسيك ....تحكيلو بلي ساكن في قلبك و ساكن في جواجيك.....فراغ..فراغ كبير ينهش فيك......
...في الوقت هاذاكا تتمنى شكون يجيك، يشدك من يديك و يقلك " الطريق طويل ... معايا خليك" و ما يسيبش يديك ...
في الوقت هاذاكا بالذات تكثر أحلامك ...
و نتيجة حلم الإنفتاح يغيب الإنغلاق ..
في حلمتك يتم اللقاء بين الراحل و المشتاق ...
في هاكا الوقت تدخل في دنيتك وحدك
في هاكا الوقت تقص حلمة على قدك ، تمسح الدموع على خدك و تضحك في وجه إلي هدك ...
تخيط أحلام بقيت تفصل فيها ليالي .. تخلي دموعك لتالي .
للحظة و إنتي تقص و تفصل و تخيط و تلبس تولي كلك أمل و تفاؤل
عن مواعيد السعادة للحظة يغيب التساؤل ... و تبدى تصنف في الأحلام و خطوة خطوة تهرب مالدنيا ... تهرب كيف تبدى تحلم بالدنيا لي رسمناها
من غير ما نعيشوها حبيناها
بالروح و كل ماهو لينا فديناها
الدنيا إلي في قلبي و قلبك حيناها ، و تحلم لي كل ماهو في هالدنيا لينا .. الهواء غادي يحيي جواجينا .. بڨيتارا و فن نحبوا نعيشوا، غادي خلينا..
تحت السماء تتعدى ليالينا ، و ضوء النجوم يترى في لمعة عينينا .. إحلم .. إحلم لي أحنا هربنا ، منعنا ... هربنا من دنيتهم لدنيتنا... هربنا منهم لينا....
و تهرب زادا كيف تحلم بالنهار لي يلم هالشعب المغبون
يحلم توا ليه سنين و الحلمة غارقة في الديون
لي قرى سنين ولى يمشي في الشارع كالمجنون .....
تحلم بنهار يصير فيه هالشعب سعيد، النهار إلي يمضي فيه إلى ما يريد ...
تحلم بفقير تعلم، يتيم مسح دمعتو و تكلم ... بكوش بعد سنين سمعنا صوتو ... جمد قلوب الناس ب جبروتو و قوتو ....
تحلم بشاعر ضيع الطريق بين الدبوزة و ممو العين ، قال نكتب .. نتفنن فيهم لثنين ...
وجيعتو تولي وجيعتين... الدبوزة ما نسات و العين تعبت على قد ما بكات ...
تحلم و تهرب ... تهرب ل كوبا و الأرجنتين ..
تحلم بنظريات ماركس و كفاح لينين .... ترسم طريقك بيهم لثنين ..
بعد ما ضعت لقيت ثنيتين .. يي زيد إحلم.. شكون يعرف بالك تزيد تلقى ثنية تنجيك من دنية الجامدين .. تقول لاهم عايشين ...
إحلم بدنيا غير دنيتهم .. ثنية غير ثنيتهم ..بعادة غير عادتهم ..
إحلم بينا... بجاه العالي إحلم وماتسلمش ... على وجيعتك ما تحكيلهمش .. خبي ، وغير وجه القوة ما توريهمش .. ماتسلمش ..في وجوههم عيط و بضعفك ما تفرحهمش ...
إحلم و خلي الحلمة تكبر ...عيشها .. من ظلامهم خرجها ..
وريها وجه الشمس ، خليها كلها ألوان ..
خليها تتفتح و تكبر و غدوا تحللنا البيبان ..
إحلم بغنايات الكفاح ... إحلم بالناس لملاح لي قاوا قاوم ، وخلي عقلك يكون سلاح ...
و عيش للمقاومة و قدم عمرك للكفاح ...
و حتى لو كان موجوع، قول بصوت عالي و مسموع " على خاطر حلمتنا و الوطن، يهون العمر و يحلى الكفن " ...
إحلم زادا لي إنتي موجود .. في الدنيا ناوي تقطع القيود .. باش تخلد نظالات الجدود ... إحلم .. إحلم بالنصر الموعود ...إحلم و قطع القيود ....
إحلم بدنيا غير هالدنيا .. إحلم و مهما يصير فيك ما تسلمش ...
إحلم بيا كيف ما نعدي ليالي نحلم بيك .. نحلم بيك و كلي أمل .. العينين تلمع، فرحة مش ألم ..
إحلم بيا كيف ما نعدي ليالي نحلم بيك، و كل ما تضعف رغم ضعفي نقويك ...
نصيح في وذنك " آآقف.. و قوي خليك .."
إحلم و للحلمة إفدي عمرك .. و على خاطرها قاوم و عيش ... و تذكر معايا كلمات بوشناق " نسناك ليالي و لو ما تجيش ... نخترعك في خيالي و بيك نعيش .."
تيي إحلم.. وفي حلمتك سكر البيبان و الشبابك ... و عيش ..
بقلم
هيام المناعي
Website Design Brisbane