في بعضنا ما نسلموش

Rihem Ben Alaya - ريهام بن علية

احنا الي تربينا مانفحجوش على الصغير

حتى يفوت الاربعين ، نخافو ليقعد قصير...

احنا نسانا كي تفوت التلاثين يقولو سعدها راقد ومكتوبها رزين...

احنا كي نتفجعو نكواو كل سبت في الولية على البوصفير. ..

وكيف نرقدو نستواو الشلايك ومانخلاوهمش مقلوبين ...

ناكلو ومانرجعوش الزهومة ،

نبلعو البابة كيف توحللنا شوكة في الڤرجومة...

نخافو على الزين من العين ونحطولو خمسة وڤرن غزال في ثنايا السروال..

ونحففوا في الشعر كيف يطوال..

كبرنا في الخير وستنينا المطرا بعد ما ترف العين . ..

نحبو بعضنا وما نشقوش بين ثنين..

وفي لعروسات تلقانا اول المتصدرين

نقطعو ونريشو حتى بالغزرة والعنين..

احنا الي كبرنا وحبينا نرجعو صغار ;

نشدو صف المكتب ، وفي خروجنا نتجاراو للدار ...

ما نلعبوش بالنار ، وكيف يطهرولنا يقلولنا شوفو العصفور في السماء طار.

احنا الي نبوسو النعمة كيف طيح من يدينا..

وللشمس نعطاو سنينا .

نصبو الماء ورا الغايب بش مايبطاش..

وندفنو الصرا في ترابنا ، بش البعيد كي يسافر يرجع يحن وماينساش...

احنا كي نسانا مادحيبش الصغار نقولو عليها مسكينة ما تضناش ، وربي ماحبهاش..

احنا الي ما نرجعوش من شطر ثنيا

وكيف نحبو حاجة نرضاو بيها كيف ما هي..

احنا برشا حاجات في بعضها وبرشا حاجات ماتركبش على بعضها ، اما كيف نحبو ، في بعضنا ما نسلموش . ..

وكي نحقدو ونكرهو نبعدو وغيرنا ما #نذبحوش

بقلم ريهام بن علية