فكرتني نحبها
Saida Jaafer - سيدة جعفرمش ديما نحب روحي
ساعات ننسى نحبني و هنا يجي دورك
باش تفكرني
و كي نتحب منك نتفكر قداه محلاني
نتفكر ضحكتي اللي حبيتها فيا
نتفكر عينيا اللي تضحك قبل شفايفي
نتفكر صوتي كي يعلى من غير ما نشعر وقت نشوفك
نتفكر كيفاه ساقيا تضعف و ترخ بيا كي تعنقني و توشوشلي نحبك
ساعات ننسى اني علاه فالدنيا هاذيا
متحبيتش قبل باش نتفكر
كرهوني في روحي ب برشا طرق
شفت لي يبردو و لي يبعدو و لي يخليوك ف شطر الثنية
شفت اللي كي يراوك حزينة مرة تولي ديما و انتي كبي
و كي يراوك تضحك ديما تولي خفيفة و ياسر تكشخ و ماسطة
ساعات ننسى نحبني و هنا يجي دورك انتي
ساعات ساقيا تهزني لثنايا خالية
و لبرشا بلايص عالية
نبقى نبحلق فالبحر قدامي
و على غفلة يجي مخي يهمسلي باش انڨز
ساعات ساق تقدم
و الأخرى تقلي لا، عندك على خاطر شكون باش تقعد حية
ما تقطعش ضحكتك مالدنيا، الهم و البغض الموجود فيها يكفي بالزايد
ارجع للي يحب فيك كل شي حتى الشي اللي ما كنتش تعرفو محلاه فيك
خليك عايشة باش بيه تعيش و تتحب اكثر
مش قتلك راك ساعات تنسى تحب روحك
و هنا يجي دوري باش نفكرك
قداه حفر الزين فيك يدوخو
و قداه عينيك فالشمس تذوبني
و قداه ضحكتك كي تشدها وقت تبدى تفدلك ف هاك التفدليك الماسط، تحببني فيك
هنا نجي اني باش نفكرك
كيفاه شدة ايدينا تحسسني بروحي حية
و كيفاه غزرة عينينا تهزني ل دنيا اخرى و عالم محلاه اول مرة نراه
كيفاه كل ما نتكى بجنبك، نحس روحي فوق السحاب طايرة ولا منعرفش وين، اما وجودك بجنبي وحدو
يحببني فيك، و كلامك ليا يعلقني بيك و صوتك و شعرك و فمك و ريحتك و لبستك و خشمك كي تهزو عليا، يهبلوني عليك
وقتها نتفكر قداه نحبك و قداه كي حبيتني انتي و حبيت الخنار الازرق الكل اللي فيا
رجعت الروح فيا و عاود دخل الهوا لرواريا، و تعبات جواجيا
بيك و بيا و اني نحب فيك نهار بعد نهار
كيفاه جيت انت و حبيتني
و كل ما نسيت نحب روحي،
فكرتني نحبها ..
سيدة جعفر
Website Design Brisbane
Tags: