صحيح ماناش مع بعضنا.. منعرف عليك شيء .. ماشفتكش ليا سنين.. ماحكيتش معاك عندي أشهرة.. وما سمعتش صوتك ليا مدة كبييييرة.. أما فرحانة .. فرحانة خاطر عرفتني و ع حقيقتي..

و كيف تعرفني ع حقيقتي ما تنجمش ما تحبنيش و ما تتفكرنيش وما نخليش ليك تراس في حياتك ما تتنساش.. و الدليل إنو حتى كيف بعددتنا الدنيا والمسافات وقت شفتني ما نجمتش تخبي الي تحس بيه ..

فرحانة خاطر متأكدة إلي لا الكلام الي ڨلتهولك ڨالهولك حد في الدنيا هذي ولا بش يوصل يڨولهولك حد خاطرو من ڨلبي وكيف يبدى الڨلب يحكي نا في روحي نحير في روحي وما نصدقش لي نا هي لي كنت نحكي.. ولا الحاجات الي عملتهم ع خاطرك وحبيت نعملهم ع خاطرك والي مستعدة نعملهم ع خاطرك تنجم تخمم طفلة تعملهملك .. ولا الحب الي نحبهولك تنجم وحدة تحب حتى شطرو خاطر موش بش تنجم تتحمل بش تتعب بش تهبل وتولي منعوتة بالصبع ذيكا الي هبلت من عشقها ل....

فهمت علاش نا فرحانة خاطر بش تبقى تحبني منغير ماتشعر خاطر حتى كان حبيت بعدي بلاصتي ما ينجم يفكها حد .. خاطر الحب الي بش يبقى مخبي في ڨلبك موش بش توصلو حتى وحدة في الدنيا هذي خاطر نا الي يسموها في الحب الحب الأول في حياتك.. خاطر اللهفة و دڨة الڨلب و أكا الاحسايس المخلطة الي ما تتفهمش وما تتفسرش الي تخليك تاكل عبد بعينيك ماكلة والي تخليك تسرح في محبوبك من غير ما تشعر والي تخليك تشوفني أحلى في كل مرة تشوفني فاها لدرجة ما تتوصفش كلهممم حسيتهم معايا نا تجاهي نا ليا نا موش لغيري.. خاطر انت الي مهما تضعف عمرك ما تبين ولا تتغير ملامحك معايا الغيرة نطقتك من جنابك وحكيت معايا كيف الطفل الصغير ..

وفرحانة خاطر مانسيتنيش وماتنسانيش خاطرني عيشتك وحسستك حاجات فوق من طاقتك وقدرتك وخاطر هاك تشوف حتى الزمان يدور يدور ويرجع يقابلنا ببعضنا نقاومو بعضنا أما منجموش.. و خاطرني موجودة في مراحل حياتك الكل م الطفولة للمراهقة للشباب الي نحنا فيه تواا.. يعني موجودة في ماضيك وحاضرك ومستقبلك ..