Soumaya Ben Rabià -سمية بن ربيع


ما تنساش،الدنيا ما تستناش،أعمللها الباهي إخدمها بقلبك وعليها ما تستغناش...بلي بش ترضى ولا ما ترضاش،ما تسكتش تكلم كان عندك كلمة أنطقها مش ما تقولهاش..بش ما تقعدش التالي تسأل وقتاش وكيفاش...إحلم كالصغار بنية صافية مش بالختار،بإرادة دافئة مش باللعب بالنار..

وبلي تعكس بش يطلع عليك النهار وبش تكمل طريقك وتمشي المشوار...ما تاقفش مأيس وحاير وكي العزوزة تقول ملا خنار...إنت ترسم ثنيتك وتزينها بالنوار...بش تعمل جوانح واطير،بش يحاولو يقصوهملك اما انت بش تزيد تكبرهم وتغزلهم بالحرير،

انت الأمل الي عندك كبير وهوما يحبو يبركوك على السرير...عيش حياتك راك إنسان،تفنن راك فنان،غني راو صوتك رنان،عبّر وثور واطلق العنان، اعشق بحنان ولون الدنيا بالألوان.. وبعينيك الحلوة اغزرلها تاو تولي تستناك على خاترك عرفت قيمتها وقيمتك وما قعدتش اطّل عليها مالشباك.