عمري ما ننسى كنهار نهار كبير نهارت الي كلمتني دقيت على باب قلبي وكيفاه جاتك الجرأة و تدق على باب مهجور مصدد ومبلج بالحديد 17 جوان 2015  ليلة رمضان الأدان في الصمعة البخور في الديار  و البو مروح بأول سحور كان اسعد يوم في حياتي يوم ستنيتو 22 عام يوم الدم رجع يدور في شرايين قلبي

كنت حالف ما نحل الباب لحد وعرف حلان الباب باش يدخل برشا كوروندار كدقيت في بالي ولاد ضغار يدقو و يهربو اما دوما غزرت من بلاصة المفتاح بعد ما نحيت الغبرة ريت ضو جهرلي عينيا و قلت هاذي هيا ريت خيال كايني نعرفو كنت نستنى فيه عندي مدة تعرقت عليك

ليلتها خرجت للقهوة فرحان نرا في الدنيا حاجة اخرى مانيش مصدق كنت نحسب بدقيقة و درج بالثانية و التنفيسة وقتاش نروح باش نحكي معاك و نشبع من تصاورك كنت عارف انو باش يجي نهار و نلقاك كنت نستنى فيك كيف الحلمة الي دخلت في اليقظة عمري ما ننسى اول نهار تقابلنا فيه كان نهار جمعة جيتني للخدمة و في دروج الخدمة قعدنا كنت نرا في الخوف ممزوج بالفرحة في عينيك كنت تغزلي و نغزلك نشوف في روحي فيك  و من الفرحة النفس تقطع عليا قلبي كان يضرب بالقوي

عمري ما ننسى اول تعنيقة اول مرة نحس ببدني فما حاجة حسيت بها جاتني من عندك ما تتراش كيفاه غدرتني و عنقتني كيفاه كنت نمسلك في يدك و نشوف في دقات قلبك كنت مقدر جرآتك و شجاعتك الي خلاتك تجيني و بعد ما روحت في روحي سكنت تعنيقتك قاعدت بين حضاني ليلة كاملة اول نهار نحس الي آنا حي كنت نحب كسوحية راسك و تخمامك الصغير برٱتك و ضحكتك و ترتيبة سنيك تذبيلة عينيك حشمتك مني كي نغزلك في عينيك

عمري ما ننسى الي حلمتو معاك صنعتك في خيالي شفت الدنيا بعينيك كنت ديما في بالي خليتني نذوق طعم الدنيا بيديك  كنت نحب حنيتك  وكلمة عسلامة من فمك حبيتك حب من حديد حب الفلاح لتراب حب الحوت للبحر حب السحاب للمطر حب النجوم للسهر كنت ديما تقولي نموت عليك و ماحبيتش تقولي نحبك بشفايفك غرت عليك ومحبيتش و حبيت روحي منك رغم الي روحك قعدت في بالي مشا في بالي باش تبكي عليا و باش تسهر ليالي تخمم فيا بدلتني فيسع ما غير لا حسيت بيا ما حبيتش ننساك مرضت بحبك كل يوم نطل عليك بالسرقة نشوف في شكون خذا بلاصتي يستاهلك تحبو يحبك باش يحبك اكثر مني رغم الانافة الي عندي سآلت عليك لا نجمت و لا حبيت ننساك في اليل نتفكرك في الصباح

انتي قهوتي في العشية انتي قصتي تصويرتك قي عينيا خات بلاصة بين الدموع ليوم انتي قادمة على خطبة  مانجم نقلك كان ربي يهنيك على خاطر انا معرس بيك في خيالي عندي مدة وكان العدول قلبي صحيح لتوا نغير و نحربط في الليل نضحك ساغات و نبكي ساعات نقول هاي هات زعمة يرجع الي فات تهنى و ماتخافش اني و الحزن و الوجيعة حبيبات راجل و لاباس نحب نحضرفي عرسك و نشوفك  من بعيد من غير ماتراني ماتنساش باش تسمي واحد من ضغارك على اسمي الحكاية مازلت حتى في غيابك و حبك لغيري نقلك انت عمري و امل حياتي ...