على سبيل الوحش...

confessions-amourMonia Messoussi - منية مسوسي

نحبك و نكرهك و من كره المحبة نزيد نحبك...

نحبك و الغش مغلغل فالجاش... باللي بش نحكي الكلام ما يوفاش...

على سبيل الوحش...

نحكيلك واللي باش نقولو الكل باهيلك...

كلام كبير و اللي بش يصير خلي يصير...

كلام خارج مع عزقة القلب اللي في كل نفس يقول راني نحب...

كلام كبيرخارج مالجواجي يحكيلك على بنادم في كل بلاصة يلاجي يلوج عليك بين صوت العصافر و ضحكة الصغير...

في زناقي و نهوجات و ثنايا و طروقات... في كل خطوة يناديلك... ايجا لهنا الحكاية توا بدات...

على سبيل الوحش...

نقلك و نقول عليك...

نقلك نحبك و نموت عليك و في قلبي مليون حكاية نحكيها عليك...

نوارة بيضاء و القلب اصفر نحسب اوراقها بالورقة... يحبني ، ما يحبنيش...توحشني ما توحشنيش...

شركة فل ريحتها تعطرق متركنة في قجر بعيد عاليدين و عالعينين... كل ما نراها نرا زين التفاح على الخدين...

خيط معلق في مراية كل يوم يقلي هاني هنا نخزرلو و نتبسم تقول هو سبب الهناء...

و في غفلة مني روحي ولات عليا تغير و تشكيلي من وحشي ليك ..تقريني كلام نقولهولك... ننساه دوب ما عيني تجي في عينيك...

على سبيل الوحش...

توحشتك و توحشت الضحكة اللي تواتيك ...توحشتك و توحشت شدة يديك و البوسة على خديك... توحشتك و توحشت توشويشة صوتك و لهفة عينيك... توحشت و توحشت و
توحشت...كل حاجة فيك...

بقلم منية مسوسي
على سبيل الوحش...