بعد غياب رجعت ندق في الباب وجايبة معايا حكاية أعز الأحباب

في نهار كما اليوم،نهير زين ، اش وعشرة سنين قبل عام ألفين، إنزادت بنية حليلتها

جيانها لهالدنيا فرح بوها وخياتها وميمتها

عينيها تسحر وضحكتها تسوى نوم العين

تعداو أيمات وسنين

كبرت و زادت زين على زين

وكل ما تكبر تحلى وتصير أحلى وأحلى

وقالوا جميلة وسلسة طويلة

الخد يسحر والقد يبهذل

مالا لا ؟؟

هالطفلة قلبت الأفكار الكل من الألف إلى الياء....

_________

شكون قال لوكان الخو ينفع خوه مايبكي حد على بوه؟؟؟

الطفلة هذي تقلو:

الخو ينفع وينفع ونص

هي الأخت إلي تحب وتخاف وتناقر وتتلكش وتضحك وتغطي وتدفي

هي الخالة إلي تعطي من روحها ووقتها واعصابها وقلبها الكلو بش تفرح الصغار

هي البنية الحنينة علي قدام ميمتها مايجي حد

شكون قال ما خوك كان والد أمك وبوك؟؟؟

الطفلة هذي تقول لا ... الخو إلي تعتيهولك الدنيا كيف خوك إلي عتوهلك أمك وبوك

هي الصاحبة إلي متغيبش

هي الصاحبة إلي تسرق ضحكتك من تحت الدمعة

هي إلي كي تقلها أي راسي تسلم ما في اده وتطلعلك من تحت القاعة

هي إلي تضرب عليك بالبونية وتسلم في الناس الكل على خاطرك

هي إلي ما تاكل كان ما تاكل إنتي وما تشرب كان ما تشرب إنتي

هي إلي تعطيك أعلى راسك ومتخلي حد يقول فيك ربع كلمة

هي إلي تقسم معك كل شي من غير حساب

هي إلي تخمم معاك بصوت عالي

هي إلي ما تفارقكش كان وقت النوم

هي إلي عشرتها على طول السنين تدوم

_______________

الطفلة إلي نحكيلكم عليها هي

صاحبتي أنا،

أختي أنا،

هدية الدنيا ليا أنا،

مرايتي أنا،

الطفلة إلي نقلكم عليها هي

عشيرتي...

عشيرتي اليوم عيد ميلادها... أليوم ربي بعثلي هديتي للدنيا ... اليوم ربي بعثلي أختي من عند مماتي الأخرى ربي يفضلهالي... اليوم أختي نحبها أكثر مالبارح...اليوم نغنيلها كل يوم حبك

يزيد وتسحر عينيك وغناياتنا الكل ... اليوم أختي تفجعت عليا خاطر ما كلمتهاش الصباح... اليوم أختي أعز ما عندي... اليوم أختي نحبها خاطر كان مش هي راني مانش أنا ... اليوم نقوللها عيشك على كل شي ... عيشك خاطرك هوني ...عيشك خاطرك أختي ...

_______________

ب.س : روتار متعمد مع شوية أنترفونسيون متع دي فاكتور خارجة على السيطرة....

وتتواصل المفاجأت ...