عالي إسمو صاحب

fausse-amitieSouha Najlawi - سهى نجلاوي

ليوم حكايتي عالي باع و خان..

موش راجل خان حبيبتو ولا مرا خانها حبيبها..

أما ع الصاحب إلي غدر و باع..

ع الصاحب إلي يهديك أوجاع..

ع الصاحب إلي عضني كيف جاع..


أما الجوع من نوع أخر..

جوع الكلمة الحلوة و المحبة..

جوع اللهوة و الفرحة خلى الغيرة ما تتخبى..

عبالو قلبو بالكره و فسخ المحبة..

جوعو خلى وجيعة ما تداويها طبة..


هكا بلاش سبب و لا سبة..

الحبة ولات قبة..

و الضجكة ولات سبة..


الصاحب إلي عامل روحو يواسي فيك..

يقلك إنسى و سيب عليك..

يا خسارة دموع عينيك..

إمسح خدودك غدوة تلقي إلي ينسيك..


الصاحب إلي تجري تشكيلو..

على وجيعة قلبك تحكيلو..

و على دمعاتك إلي ع الخد يسيلو..

آه القلب يا حليلو..

مشى في بالو صاحبو و دليلو..

قداش عدا الليل بطولو يحكيلو..

على عشقتو و هبالها يرويلو..

و بالفرحة يطير و يجريلو..

من ربي و نارو يا ويلو..


الحكاية كتبها و ألفها..

و من غدوة مشالو خرفها..

تي ماو الحكاية مالأول يعرفها..

زادها اﻹفاح و غلفها..


هزها باردة و سخونة و كيف تبرد يزيد يسخنها..

تي ماو هاكي الخبيزة و لازم يعجنها..

صنعتو لازم يقدها و يتقنها..

و الحكاية قتلها و مع اﻷيام دفنها..


زعمة الشيطان غر بيه؟؟..

ولا الغيرة عماتلو عينيه ؟؟..

ولا قنطرة و جات لساقية ؟؟..

باش يدور الساقية ليه !!! ..

تي يلا آش علينا فيه..

الدور و الباقي ع البوهالي لي عطى وذنيه..

و صدق كل كلمة تقالت ليه..

وعفس المحبة بساقيه..

و الساقية دارت بدموع عينيه..


المظلوم عندو ربي..

هو يخلص الحقوق و يكشف المخبي..

تطوال ولا تقصار الظالم حسيبو ربي..

 سهى نجلاوي
عالي إسمو صاحب