شعلي سيغارو و حطهولي في فمي ... قوي صوت الموسيقى و عنقني .. بالقوي .. اخنقني .. اوجعني .. بكيني و ما تمسحليش دموعي .. طيحني و عمرك ما تقومني .. تعلمت ناقف وحدي تعلمت نمسح دموعي و نتلف جروحي حتى يبراو .. حتى نتعود بالوجيعة لبنينه ..

خليني و ماترجع كان كي تراني قاعده نموت ..ماترجع كان و انا نطلع في الروح .. عنقني و امشي .. النار لي فيا تحرقك تحرقك و تحرقني ..اقتلني .. انتي الموت لي ستنيتها .. انتي الموت لي كتبت و بكيت و مثلت و انا نعيطلها.   اسكني .. جنني .. هزني بعيد ..  

شعلي السيغارو الثاني .. حطلي فيلم مزيان .. دفيلي الصقيع لي في قلبي .. اقرالي رواية مزيانه .. اعطيني وردة بيضه اما قبل ما تمدهالي غرقها في دمي لين تولي حمراء ..اوجعني اكثر و اكثر .. سكر عليا الباب و خليني تحت المطر حتى نمرض .. و كي نمرض رد بالك تاخولي دواء .. انا دوايا .. نحبك كيما نحب و نحبك تكون عذابي و حد .. حد ما عندو الحق يحاسبني و لا يتدخل في حبي و حياتي .. كرهتكم و كرهتني . كرهتكم لكل .. و ضعت فيك انتي ..

الموسيقى تقوى و البيت ظلمه ..  تطيرني بعيد .. ” ناثينغ ايز غونا هورت يو بايبي ” و كلي وجيعه و انا قاعده نموت .... يزيتش مالكذب .. يزيتش مال.....؟ تكذبش عليا .. قلي راك شتخليها بيا ، قلي لي ما نعنيلك شيء ، و لي ماكش بش تعنقني و تحميني .. و رد بالك توعدني بفرحة ..  اقتلني و تكذبش عليا يزييييي تعبت.

ابعدني . لا ماتبعدش ماتخلينيش مانجمش...ماتخلينيش ليهم ... هربني بعيد .. ماتخليهوش يوصلي .. ماتخليهوش يحط عليا يديه لمسخه مره اخرى ...ماتخليهوش يعاود يقتلني ..

نلوج عليك مانلقاكش نعنق لهواء .. اما نسمع صوتو. .. تي كيفاه سمعت صوتو انا و الكيت في وذنايا .. ندورلوا نقحرلو .. نشوف السكينة في يدو و نضحكلها .. توحشتك ..توحشتك في بدني.. ما تحرمنيش مالموت ..

الموزيكا تهبلني و هو يقرب السكينة تغرقني في دمي و انا شايخه مع الايرغازم .. اش خير من واحد يموت و هو يسمع في الموزيكا ؟

ختام حفيظ