Farah Sebti - فرح السبتي

قوم ، دور ، تكربص ، تكرفص وغفص. صيح ما بين الحديد ونحاس الحيط . عيط ، هز،أصبت ، اضرب ، خبش . ما بين نومين ، لحظة ، دقيقة ، ثانية ، جزء من الثانية .. نفس ، تنهيدة  ..   قلب يطربق طربيق!  آه !كابوس وتعدى . عين محلولة ، بالدموع مخمورة وبالكحل مغسولة . عين تبحلق في السقف تلوج على شوية بعد من القلق .

دخان يعجعج خارج من الفم ، كل دخنة تروي رواية وتغطي ألف حكاية ، كل جبدة تفسخ في الهم وتعوضو بالسم .. منين جيت ؟ منين خرجت؟ مكنتش في الحساب ..قاعدة نتنفض ، نتهز ونتحط. .. نحب نتفسخ من جلدي ، نتمحى من أصلي ، نتدفن في قبري ، نحب نذوب كما يذوب الملح في الماء ، كما الثلج إلي بشمس يتكوى.. 

نحب نضيع كما تضيع القطرة في وسط رمال الصحراء وكاس الخمرة.. أما.. لكلو من عينيك .. شمجيبني ليك .. شمكلمني فيك ؟ شعرفني عليك؟ شلزني ليك؟ شكونك بش تهزني؟تحطني بين يديك، وتلعبلي عينيك ، دحنس بصوابعك ودفيني بخزراتك، تمرجني بهاك الضحكة ، تقهرني بهاك الخزرة ..تردم في الهم وتغطي فيه بالخنن؟؟

تتمنيك ؟ تترهدن ؟تجبد بالمرتاح ؟ولا دازز فيها تلعب في بنات الناس؟ فيق ماكش ليهم ،يزيك من الخوف ابني الجديد ، فيق وشوفني نعشق فيك ونعبد فيك عبادة ، نخشعك ، نتروى بحبك ونتبنن بعذابك نتقهر بكلامك ونتفنن في رسمانك ..

فيق وشوفني نبني في حكايتنا ، نرى في رواحنا  بعاد وين الزمن حار وقال : اسكتوا هاني وقفت أما مشني دايم  ، اغرقوا في بعضكم، اعرفوا العشق ، اعرفوا مورو و ملاذو، وحرامو حلالو.. شمجيبني ليك ؟شمقريني فيك؟ شمعلمني على يديك ؟ خليني نتنحى من الوجود خنرتاح ، رتحني ، راك تعبتني .