شكون اللي كان يقول

Yosra Missaoui - يسرى الميساوي

أنا اللّي كنت نقول ما ننساش.. ما نجمش ننسى.. نموت كان ننسى..

أنا اللي كنت عايشة بيك.. بتبسيمة منك.. بتفاصيل نهارك.. بريحتك.. بترميشة من عينيك..

أنا اللي كنت نقول كان تبعد علِيّا نموت،

إنتِ الهوى اللي نتنفسو،

أنتِ الشمس اللي نعدِّل عليها نهاري،

و أنتِ قمرتي اللي نبات الليل نشكيلها همومي و نخبي في حْضُنْها أسراري..

أنا اللي كنت نقول انتِ جنتي في الدنيا،

صحّة لِيّا أنا المحظوظة بيك،

الناس الكل عندها جَنّة و أنا جنّتين،

جنّة تحت ساقين أمي و جنّة بين يديك..

أنا اللي كنت نقول ما ننساش..

كيفاش ننساك و معاك تعلمت الغرام،

كيفاش ننساك و أنا بيك نقاوم في الامرار

كيفاش ننساك و أنا اللي حبيتك بقلب أمّ, و قلب الامّ إذا حَبْ ما ينساش..

أنا اللي كنت نقول ما ننساش..

أنا اللي حبيتك بقلب الطفلة الصغيرة اللي فيا.. محبّة صافية و غنية..

أما شكون اللي كان يقول.. قلبك اللي وْعِد ما يوفاش و قلب الطفلة اللي فيا يتوجع و ما يبراش..

يسرى الميساوي

Website Design Brisbane