شبيك ساكتة

شبيه خيالك باهت

شبيه قلبك بارد

شبيك؟؟؟

بدلك البعاد...بدلتك الغربه

شبيك حزينة ...ساكته ...شبيك ماكش تغني كي العادة ...حتى التنهيدة ماكش تتنهد؟؟؟؟؟؟؟؟؟

يسكت ويجري لكل تركينة من الدار يلوج عليها ...يحاول يتبع ريحتها

من النهار إلي مشات مابدل شي فنجان القهوة فوق الطاوله ...كتبها في الرفوف ....أوراقها مطيشة ...لعبتها على الفرش ريحتها على المخدة الكحل مكبوب في القاع ....روبتها فوق الكرسي...والمراية مكتوب عليها بالروج يا مجرم نحبك

يدور ويعيط كي المهبول وينك ؟؟؟؟؟

وين مشيت مازلت تكره الأحمر؟ أنا مازلت نحبو

مازلت تحب المطر؟

ماعادش صبت المطر

يجري للراديون يحط غنايتهم"أنت ياجنة حبي وإشتياقي وجنوني.....

أم كلثوم تغني وهو سكت والدموع تجمدت في عينو...باهت كي الليل

تفكرها ...تفكر الليلة إلي سمعو فيها لغناية ..

كان شعرها طويل مغطيها كانت لابسة روبه زرقاء وزنودها عريانة وعينها مغرغرة بالكحل

تذكر كي طلت عليه من شعرها الهايج

تذكر كي قتلو نحي الدخان وتكيفني

شعل البريكية ....شعل الدخان ...فاحت ريحتها وطل خيالها في سحاب الدخان ....

هو :وين مشيت

هي :قتلك لوج عليا

هو:هاني لقيتك

هي مازلت ضايعة

هو :أنا ضيعك

هي:تطرشق بالضحك

هو:يتنهد مالجواجي ويجبد النفس ويطلع الدخان وتزيد تظهر هي

كيما هي

تسعة سنين وانا هايمة بلاش بيك ...بلاش أحلام بلاش ضحتك...بلاش لمستك...بلاش خزرتك ....

تسعة سنين وأنت تلوج عليا....؟

يمد يدو..يحب يمسها

يحب يحسها

يحب يضمها

يحب يشم ريحتها

يحب ينحيلها حوايجها ويلبسها

يحب

يحب

يحب....

هي :ماتحاولش ماتقربش أبقى غادي

تثبت فيه ...في ملامحو في شعرو ..في يدو...

شاب....جلد ...كبر

آه ياحسرة

هو: علاش ؟؟؟؟

هي: خاطر وخاطر وخاطر وخاطر....

هو: غن نحب نسمعك....

هي:ن سيت نغني

هو: ملي مشيت وأنا وحدي ...خليتيني للمدينة الخالية من وجهك وضحتك ...للحيوط الباردة لنسا الشوارع ...للبحر الهايح ..للسما المسحبه للأرض القاحله

هي :فك عليا من الحديث

خليني هاني معاك توا

يزيني من الوجيعة والي تعدى وإلي جاي

تكيف يامجرم باش نبقى

تكيف باش نشمك باش نحسك ناش نضمك

نكيف باش نبقى