الليل بالڤمره والنجوم اضوى من قلوبهم .. بالريح والظلام والخوف .. اأمن من بيوتهم .... صوت الكلاب والكراهب احسن من صوتهم ..

الليل الهايج والمايج مرتاح اكثر من بالهم .. الديار الراقده والبيوت الشارده والناس الباكيه الى مكحلش عينيها النوم الزمان اولى بيهم ..

الحضن البارد والفكر الخامد والقلب الميت كلو من همومهم .. مصالح فلوس كره حقد بغض حسد كذب يبات معاهم في الليل ويفيق مع نسمات الصباح باش يعذب كل روح محطوطه بين المنسيين باش يغدر ويجرح عباد تبكي في الليل .. ضميرهم مات .. فمهم معبي بالسكات وفي ايديهم سكاكن تجرح العباد .. دينهم النفاق .. يتغذاو على عذاب العباد... هوما حكايتهم ظلمه اكثر من سواد الليل .. السواد يتبرى منهم ويقول هوما الي ماخلاو النور يطل مخالوش الضحكه تهل والفرحه ما تمل .. ..

الحبار كمل والكلمات في حق نفاقهم ما توفاش .. نحكي عليهم حتى كان ملقياش وين نكتب باش نكمل نحكي عليهم اي هوما !! وحوش الليل الي قلت قلوبهم اسود من ظلام الليل نحب نقول راني كرهتهم تعبت منهم .. سلمت فيهم .. اما يجي نهار وكما تدين تدان يجي النهار والنور يفسخ الظلام يجي نهار وكل عبد خاين غدار يتدفن تحت الساقين واسمو يولي بين المنسيين يجي نهار والحلمه تفسخ وسخ الليل وتاخو حق كل قلب مقهور كل عين بكات لين طفا عليها النور ! يا اوسخ ما فما يلي مصنوعين من انسانيتكم يجي نهار والانسانيه تتبرى منكم .. متخافوش الليل متاعكم باش يمشي معاكم في دنيا بعيده على القلوب النظيفه وهمسة الليل الخفيفه والدمعه الرقيقه ! هزو الليل وكان تحبو الڤمره والنجوم وخليولنا قلوبنا الصافيه شمسنا الضاويه وانسانيتنا الي هي كسيبتنا ... اي انتوما مخيبكم !