سكّر بابِك

try-another-waySyouar Boughanmi - سوار بوغانمي

سكّر بابِك

وقدام العتبة حط سبعة حجرات وعلّق ما يحلالك

فسّخ كلامي من جواباتي

وكان ما حبّش الحبار ينكر حكاياتي

أحرَقهم

وسد مليح عالرّيح شبّاكِك

لا على غفلة يرجّع الرّماد مع الغبرَة

سكّر بابك

وفي دارك حُط غناية من اللي قبلي

تخلّيك تحقرني -من غير ما تقصد- وين ندقّ على بابِك

وتقلي ما سمعتش

وكان حلّيت تعطيني بظهرك وندخُل وحدي

ما تدخّلنيش

وكان دخّلتني.. بنطرة

سكّر بابِك

وكي تسمع خطوة حد متعدّي من بحذاك

علّي الغناية

وفي عِز الغناية

وين توصل الخطوَة لبابِك،

علّي في صوتك مع الغناية

لهّي روحك وغمّض عينيك وحُط خيالات ما تشبّهليش

واِشرد لبعيد بش ما تشوفنيش

وقت نكون على بعد خطوة

وكان الأرض ما ساعتّكش عالهربَة

اِردِم في ترابِك حفرة

واتخبّى بكلّك

سكّر بابِك

بدّل الثنايا اللي تهز لعنوانك

وضيّعني كي نسأل عليك جيرانك

وما يدلّونيش

سكّر بابِك

وكي تضيق بيّا الدنيا ويغلبني الوحش ونجيك

ما تحلّيش

كي نوصلك وأنا نلهث ونقلك توحشتك ما تردهاليش

سكّر بابِك

وكي ندق وما تحلّيش

ونشوف السبعة حجرات اللي قدام العتبة

نمشي بغصتي .. نشق ثنيتي نبكي

ما نسخفكش وما ترجّعنيش

كي توفى الغناية

ويدخّل الرّيح رماد حكاياتي من تحت الباب

وتحس بحاجة أقوى مالنّار اللي حرقِتني مع جواباتي

ما تشقّش ثنيتي وما تجينيش

ولو ريتو خيالي ضْبَابْ من بعيد

ما تتبّعنيش

سكّر بابِك

ووعد منّي ما نجيكش

وعمري لا ناقف على بابِك

وخلّي الحجرات سِد باهم تحت بابِك

لو كان تخاف لا يجيك رمادي

تحرَقتْ قبل جواباتي وتِبعَثتْ

ونسيت كيفاش تتنطق "توحّشتِك"

والثنية اللي ليك تهز ضيّعتها

ومعادش حلّة الباب تكفّيني

لو فيبالك

سكّر بابك

وعلّي في غنايتك

وعلى شبّاكك مسرَح كيفما تحب شخصياتِك

حط في كل تركينة حكاية قديمة من حكاياتِك

وأنا ادفنّي في الحفرة

وخلّيك عالارض ما تتخبّاش

ما تخافش لا نشدّك في عز الغمّيضة بغدرَة

وفات اللّعبة والثنية الباردة خلاتني نخف خطاويّا

وروحت قبل ما تجي الڨمرة

معادش نستناها بش توصلّي أخبارك

ولا تحكيلي عالشوق اللي مشعّل نارك

سكّر بابِك

واطمان

عمري ماني بش ناقف على بابِك..

ولو السما تهبط عالارض

عمري ما ندق باب في وجهي تسكّر

ولا نقول للّي باع ودّي : طوّلت غيابِك

سوار بوغانمي

سكّر بابِك