شــنبدا شــهر مــاي .. المــرّة هــاذي قــوِيّـــة !

و هــذا .. نص .. من دمــِّـي و هـــمِّي لكل مــرا .. بنــوتة و صبــيّـة

صحيح .. عندي برشا مــاكتــبتلكمش .. أما أوراقــي بيــكم معـُـبِــيَّــة ..

صبـــاح .. و ليل .. نتغــنــى بيكم .. و.كل عـــشــيَّة ! ..

لكل مــرا .. ضعيفة .. قوية .. تونسية .. برانية .. صغيرة .. كبيرة .. قصيرة .. طويلة .. مالمدينة .. والا ريفـــيّة ..

ضعيفة .. والا بطبوطة ..

خــوّافة .. والا رقعة كيف ابن بطــّـوطة !

شقرا .. و الا سمرا .. متحجبة .. والا لا ..

عينيها .. كحل .. شهل .. خضر .. زرق .. تخدم .. تقرا .. شادة الدار .. معرسة .. والا لا ..

تحب .. تكره .. تهبل .. تريض .. تعقال .. و مالكاس .. تتمرد و تفيض !

لكل بنوتة .. ولدت و بنت و عملت من روحها قــضيّـــة !

محــلاك .. محلاك .. يا لُخـــيَّـة ! ..

محلاك و انتي تمشي في الشارع و بوك رافعتلو الراس ..

محلاك كيف تقوم .. الصباح .. تصلي و تحضر و تقرا قرآن و تعمل الفطور و تحط الماكلة و تصب لبوك قهوتو في الكاس ..

و تمشي تقرا و تروح و تضحك و تدور بالبسبة بين الوجوه .. و هوما .. منك بايهم كلوه و ماخلوه ..

ترجع للدار لا تدللها لا راس لا ساس .. و تتبسم و تخرج منها تخليها مريڨلة و لاباس ..

و تعيش عند بوك .. دلولة .. متحفنة .. و تخرج من عندو كان برانساس ! ..

عايشة حياتك كيفما تحب .. لا تعدل علا حد و لاك عاملة لعبد راس مال و أساس ..

و مبهاك .. كيف تخرج الصباح .. و تقول الصباح رباح .. و تتعدا و يحبسولك الكراهب في الكياس ..

و محلاك و انتي تحب في العباد الكل .. تبوس في الصغار .. و تعاون الكبار ..

و تضحك حتى و انتي تتفرج في السماء عالأطيار .. نسنـــاسة .. أما و راس بابا مالقلب الأبيض اللي عندك تسأل عالعباد و الأخبــار ..!

محلاك .. كيف تكبر .. و تعيش و تتفنن و تولي حرة مع الأحـــرار ..

و كي تغيب .. بلاش بيك .. لا تبرد القــلوب  .. و لا تهفت النـــار !

أصلك .. الحل الوحيد .. للقلب المتاخذ .. للروح التــاعبة .. و للعقل المــحتار .. !

يحــطوك في العينين .. يحطوك فوق الراس .. أصلا هوما ماعندهمش خــيار ..

هكاكا .. و انتي تحير ساعات .. أما مقدية .. أم الزين الجمالية .. تعرف تختار .. و ديما تطلع بأحسن قرار ..

الدنيا الكلها متقوية بيك ..

انتي اللي تفيق الصباح  .. تجري و تجري  .. بين القضية و الخدمة و القراية و ساعات الراجل و الصغار .. تخدم و تنظم و تغسل و تنظف و تروح و تريفز و تلعب  و تزها .. تي عاطينك كل الأدوار

..

و قليل وين تتعب .. أما كيف تتعب .. حساسة .. فيسع تنهار ..

انتي اللي بلاش بيك مفماش ضو في الدار ..  حتا النجوم تطفا .. حتا الأقمار .. انتي الشمس الضواية ..

انتي نسمة صيف سخون .. انتي دفا شتاء جانا بارد .. انتي و انا .. حلمة يحققهالنا مارد .  

انتي كلام ماتقالش  .. مالقاش بلاصتو .. شارد .. انتي شاعرة .. شاقة طريق واعرة ..

انتي ثلج مايطاقش سارد .. انتي نص .. حكاية .. غناية .. رواية .. وصف في موضوع وارد ..

تنجم .. اي تنجم ..

شكون قال ماتنجمش ..

في كلامهم ماتخممش و بأوهامهم ماتحلمش .. خاطرك تنجم ..

تقرا و توصل و احلامك تحقق .. تشرف ارضك و بلادك و تعمل في السماء نقبة و ثنين ..

تمشي لروما .. تمشي للأرجنتين ..

تعمل التور دو موند يا سيدي علاش بلاصتين ..

ضاعوا عليا الكلمات .. و الريم و القافية ..

حروفي تشطح و تتمايل عليك فوق الورقة حافية ..

انتي تحفة .. انتي فن .. انتي الزين .. العين .. القد .. انتي الكلام شويا فيك ..

انتي لبسة مزيانة تحليك

كلام مثقفين مواتيك ..

انتي تربي المجتمع علا ايديك . ..

انتي كتب قريتها .. و في مخك شديتها ..

انتي المثقفة الواعية الحالمة .. الواصلة .. القارية .. نتي اللي العيلة عاقدة نوارتها فيك .. عليها معملين و بمستقبلها الباهر حالمين ..

انتي اللي تخلق البسمة في الدار .. ..

تطيح .. و تقوم .. و تتمرمد .. و تتمرد و مخد لبعيد يعربد .  

تشد الستيلو كيفي و تكتب حكايات و ابيات و روايات ..

تكتب حلمات و طموحات و سهريات ..

تكتب اهات و ليعات  .

تكتب كلمات فيهم بكيات ..

و انا نشد الستيلو و نكتب علا روحي و علا كل بنية كيفي ..

نشد الستيلو و نكتب كلام ..

نكتب عالحرب عالسلام ..

نكتب كلام مسمام .. النون فيه تولي لام ..

نكتب عليك و عليا ..

نكتب حروف .. نكتب حاضر مقدم مايشوف  .

بين العيشة المكروهة و الكلمة المنطوقة .. نلوج على حلمة .. و نلوج على ضو في ليلة ضلمة ..

ليلة يبدا فيها الضو مقصوص ..

ليلة نغرق في الحبار و البحار و نغوص ..

ليلة نعرف اللي في بلايص اخرا يكثر قيها البوس المرصوص ..

ليلة يتقال فيها الكلام اللي يخنق و ليالي محبوس ..

يتحول فيها الخوف لعبد مكبوس .  

يتبدل فيها كل شي .. كل شي تراه من ملموس لمحسوس .  

تولي تحس .. و قلبك يوجع ..

وفا عليا الحبار .. و عالحاضر و الماضي ثور و معاك نثور و منهم نهرب ..

نخمم في اللي جاي .. و عليه باللام نضرب ..

خمم تراه في حاجة تكون فيها انتي لولة .  

تي دخل فيهم غولة   

حل فيهم حرب .. تكسير و ضرب ..

و حب  .. راك قضيّة