دموعها هابطة تْهَرْهِرْ على خديها ... خزرت لروحها في المرايا و قعدت تثبت ... "وجيه ها البنية نعرفو" ... " عويناتها الضويقة هاذي نشبه عليها ... ها الغزرة الكاسحة قداه تعبت ... وجيه ها البنية درا وين ريتو ... "

لمت شعرها الي تْنَتِّفْ بايديها ... تنهدت ... عدات صوابعها على كل تركينة من وجهها ... تقول عليها تتفقد نقصثشي حاجة ... زادت قربت و قعدت تثبت ... " وجيه ها الغشيرة نعرفو .. وجيه ها البنية درا وين ريتو ...

تذكرت كيفاش كانو يعيطولها أم الضحكة المسرارة ... جبدت حميرها .. تزينت .. و تبسمت للمرايا و قعدت تثبت .. تغزر .. تتفقد .. طَرِبْقِتْ شفايفها على بعضهم تقول تستفز في حبيبها على بوسة ... تستعرض قدامو اش عطاها ربي من زين و مناتو بيه ...

أما دمعتها خانتها و هبطت تجري خيرها سابق على خديها ...

" وقيت سيڨارو " ... ووقيت لغناية .. شكون غيرها باكا الصوت الحنين يشقلها عروق قلبها ... و اكا الاصول الارمنية كي تتغنى ...

.. دعوني أجود بالبكاء .. على وحيدي وحدي .. فانهمري يا دموع عيني

و كملت عليها غصتها و شهقت ...

- اشكي !

- توحشتك

- شبيك ?

- زيد الماء زيد الدقيق !!

- اتكلم ..

.. وخانني جلدي ..وحيدي قضى وحيدي .. الحبيب فتفطري يا كبدي

- كبدتك مشوية !

-شبيك عندك قداه ماطليتش عليا ما تتفقدنيش !

-ديما نشوف فيك .. حارسك .. بحذاك .. بجنبك .. عند راسك .. حاميك ..

-عزرائيل لا حب يتفكرنا لا يجينا .. فالح كان في العزاز علينا ..

- المرة هاذي وجيعتك مرة !

-مش قتلك زيد الماء زيد الدقيق ..

وحيدي قضى وحيدي .. الحبيب فتفطري يا كبدي ...

"لينا بدات تعلي اعصابي تهدت "

-فاش تستنى !!

-نستنى ... نستنى في الڨمرة الي غبينة ...

نستنى في غدرة الطحانة الي فالحين كان فينا ...

نستنى نسرق فرحة من غناية و ميسالش لا سمعنا و لا رينا ...

نستنى في حلمة تفيقني مالثملة هذا كان صحينا ...

نستنى في روحي نصيح و نطيح و نقول العمى هانا تبلينا ...

نستنى في فرحة ملقوطة فرخة حرام ميسالش غير نفرح حتى ناقصة .. اما شاهية نقول هانا تهنينا ...

و فديت ..

فديت من ناسخ " كان " و اخواتها العاهرات ...

نحب نعيش .........

تسمع في الحس !?

- حس شنية

- حس السكات صدعلي راسي !!

حس الكلام قول تراه هاني نسمع ... ايجا نفركو الرمانة ... ناري انا عالحنانة ... جات تفرح ياخي الفرح ما واتانا ...

هيا اتكلم اعملي محاضرة كيفاه ما يلزمنيش نتكيف و نقعد ساكتة خاطرني مرا ... اووووووف ..

-شبيك

-سيڨارو وفى ... هيا عاد قول الكلمتين متاعك و اعطيني السبع طرق العصرية لتحقيق السعادة و ماناش بش نفرحو

-علاه

-خاطر الدنيا هاذي انت تزيد الماء و هيا تزيد الدقيق و الزمان يزيدكم شوية سم ... و فريش ..و فريش لاها العيشة ... نحب نبدل ربها انا .. باهي نعدل ملايكتها .. باهي نحب نفرك الرمانة

...

- منين تجيب فيه ها الكلام آ حنانة ...

- هذاكا قالتو بنية شبهت عليها في المرايا اما مش أنا

بقلم نورس زغبي