خَاطِرْهَا مرَا …
Wiem Hbaieb - وئام حبيّبمرا ...نساء... طفلة... أنثى... بنية... حواء...
موش مهم الاسم .... المهم كونو كيف تسمع وحدة من هاذم.... لازم بدنك
يتقام و يتحط ... لازمك تخاف على روحك ....
خاطرها مرا...
خاطرها مرا قوية و بغزرة تهد حيوط....
خاطرها مرا ذكية و بضحكة تذوب جبال....
خاطرها مرا لازمك تقدرها...
و رد بالك تخمم توجعها راهي تنفيك...
خاطرها مرا كان ترا دمعة عينيها تموت ...
خاطرها مرا و فيها تارا روحك ...
فيها و عليها و منها تنجم تارا رجوليتك ...
خاطرها مرا كي مرضت سهرت بيك خايفة عليك ...
خاطرها مرا لازمك تحبها و تخبيها ...
خاطرها مرا لازمك تصونها و في قلبك تخبيها...
خاطرها أمك ... خاطرها مرا ..
خاطرها أنثى ريڨتك سالت عليها...و خاطرها أنثى تعاركت الرجال عليها...
و خاطرها أنثى واثقة من روحها...
و وقفتها تهبّل كل من جات عينو عليها...
خاطرها أنثى تمشي بالرنة تتبختر و زينتها تغني على وهرتها ...
خاطرها أنثى تغير عليها...
و هي سحرتك بعينيها...
خاطرها أنثى خلاتك تموت و تعيش على عسل شفايفها...
خاطرها أنثى عقدتكم ببدنها...
خاطرها أنثى نصف دينك يكمل كان بيها...
خاطرها مرتك... خاطرها أنثى...
خاطرها بنية...
خاطرها بنية دمعتك تبكيها و ضحكتك تزهيها...
خاطرها بنية تعطيك قيمتك كي تقلك بابا...
خاطرها بنية بكاتك كي نفضت لحيتك مالتراب و انت تدفن فيها...
خاطرها بنية بها خرجت مالدنيا...
خاطرها بنية هزتلك راسك بين العباد...
خاطرها بنية شكروك عليها في كل ثنية ...
خاطرها بنية مزهية الدار و تفرح كي تشوفها قدام عينيك صبية...
خاطرها بنية تخدم و تشقى باش تجيبلها الي تحب عليه هيا...
خاطرها بنتك... خاطرها بنية...
خاطرها طفلة... خاطرها تحملت عياطك...
وصبرت عليك...
خاطرها طفلة تتعرى في الليل باش تغطيك...
خاطرها طفلة سمعت كلامك...
خاطرها غطات عمايلك...
خاطرها صانتك و حفظت شرفك...
خاطرها طفلة غسلتلك دبشك...
و تخرج في عز البرد تجيبلك دخانك...
خاطرها طفلة تحنن عليك...
و في كل شي تقرالك حسابك..
خاطرها طفلة عمرها ما عيطت عليك و لا أهانتك...
لازمك تقدرها خاطرها أختك... خاطرها طفلة...
خاطرها حواء...
خاطرها حواء و خرجت آدم مالجنة...
خاطرها حوا خلات سيدنا ابراهيم يكذب من خوفو عليها...
خاطرها حواء سيدنا محمد عليه الصلاة و السلام حكا على كيدها...
خاطرها حوا خلات فرعون يدخل موسى لقصرو...
خاطرها حوا جابت عيسى من غير راجل...
خاطرها حوا...
خاطرنا أحنا النسا...
فخر ليكم..
أحنا نجمو نعيشوا بلا بيكم..
و نعيشوا نضحكوا كان من غيركم...
خاطرنا النسا ما ربحنا منكم كان الهم و الدمار...
خاطرنا أحنا النسا الي حياتنا ما تقافش عليكم...
أما انتم حتى شي ماتجيو من غيرنا..
متنجموش تعيش من غير أم تحنن عليك...
و لا من غير مرا تهنيك... و تجيب منها بنية تزهيك...
المرا هي الشمعة و انتم الظلام ...
أحنا النجوم و انتم اليل...
أحنا الشمس و انتم الريح...
أحنا شجرة و انتم الورق...
أحنا المطر و انتم الرعد...
أحنا الوردة و انتم شوكها...
أحنا كاملين من غيركم و انت تكملو كان بينا ...
المرا عمرها ما تكمل بالراجل... المرا تكمّل الراجل....
تحية للنسا الكل...
بقلم وئام حبيّب
Website Design Brisbane