Assia Mrabet - آسية مرابط

تي فك عليا بربي فدتني في روحي كرهتني في عيشتي مرجتلي الكبدا متاعي و إنتي نهار لكل واقفلي كالشوكة في حلقي .. في لبستي .. في ماكلتي .. في حوايجي .. أصحابي... كلامي...تي حتى من أفكاري

حتى لين معاد فيها وين قلت نكتب هالكلمتين ...يمكن نرتاح و يبرد ناري .. خاتر كي نجاوبوا و نغلبوا بكلامي أمي تغمزني من بعيد لبعيد .. << وه يا بنيتي مانو إلى خوك الكبير و الخير ليك يريد .. و أنا نسايس في روحي و نهدي.. خَلي العقل مني! هاني نحبس في دموعي و نخبي أما الله غالب الشي أقوى مني أنا هكا بعزتي مش خاطرني أنثى نتذل تولدت حرة و نموت .. حرة بأفكاري علاهم متطورة ياخي تحبو تجبدوني معاكم اللوطا بالسيف

أذيكا هيا العيشة قمع و ظلم و قهر بإسم الأخوة .. ما تفهمونيش بالغالط تي و الله راني نحبو خويا كي كنت صغيرة و عاملا عملة كنت ورا ظهرو نتخبى و سئلتو نهار .. << زعما كي نكبر بش تقعد تحبني هكا .. قالي إي، قالي إي و صدقتو، قالي إي و عنقتو

أما التصويرة تقلبة معادش نعرفو .. صدري اللي كان مستوي إدور ....كبرت و وليت في عنيه لازمني تربية من الأول .. لازم كلمت "لا" إنحهالي، لازم شخصيتي إفُكهالي .. تمنيت لو ما غلبتنيش الدموع تمنيت لو عليه نتمرد و نثور .. أما شنوى أخرتها الخو ما عاد إكلم خوه و أمي مابناتنا بقهرتها تموت ..


المهم كان عندك أخت حطها ما بين عينيك مش تحت ساقيك .. كون بجنبها بش تساندها مش وراها بش تراقبها .. و إتذكر إلي رجوليتك في مخك مش مبين سقين أختك