خاطر مطلّقة

femme-divorcee-societeKhaoula Ouaynia Baccouche - خولة عواينية بكوش

إهداء  الى كلّ امراة  مطلّقة و الى كلّ طفل امّه مطلّقة  جار عليها الزمان و ظلمها العربان  و تبّا جزيلا للعربان

- ما ثمّاش خروج

-علاش يا ربّي علاش  كان انا اصحابي

-اسكت عليّا تره   صحابي صحابي صحابي  صحابك يكركرو كيفك  فكّ على امّي  كلّ عام و انا شانعة في جرّتك يا فرخ

- امّي شبيك اطّيحلي في قدري

- اممم ههه والله  ضحّكتني قدرك اناهو قدرك؟  قدرك اللّي انهار و ماجابو وانا ننبح على تخميل بيتك  على  حفظان  دروسك على الهومة البرّة  يا ربّي اش عملت تحتك و بعد العباد
ماترحمنيش ماهو  ولد مطلّقة.

خزرلي نعرفة يكرهها الكلمة وانا زادة  نكرهها العرب حاشا من فيهم من نبيّ و من وليّ  الطلاق عار ميسالش  صوحب عليه  اما الطلاق  عيب و عار ميسالش خلّي يعفّس عليك و يمعسك  خير مالطلاق  الناس الناس الناس  الكلام العيب العار  ....الله غالب اذاكا مكتوبي خذيت راجل مسوّد و ايّامو تكرب صعيب  مصطّك ديما كارك  بارك علّة على القلب ........ الوالدين  يرحمهم و يغفرلهم  خوذ راك ضفرت الشيب خوذ راك برت خوذ  تجيب صغير تتسنّد عليه  اللّي قبلك خذا و اللّي بعدك انزادلو غشّير  و خذيتو  حقّة حقّتين  دافي وولد عايلة و متربّي في الخير اما انت شرفت  ارضى باللّي  يجي و الفايدة في العشرة ..

خذيتو  من اوّل ليلة عرفتو و فهمتو .. من اوّل ليلية قلّي  راو الكراء عليك و الماء و الضو عليك  و المصروف نتشاركو فيه .. فهمتو  هزّيت عيني لربّي ساعات طاعة الوالدين تهزّ للفينقة ... ربّي يفضّلي ولدي و يهديه.. مشحاح فنيان  ديمة تاعب لايحبّ يخدم  و لا يحبّ يصرف كي عرفت روحي حبلة  خفت  مسؤولية جايتني  امّ مع بهيم  جبت ولدي و طلّقت لبهيم .. عام معاه  منعيّطلوش باسمو و في قلبي نعيّطلو بهيم  مسكين ولدي بوه بهيم ههههههه ... ارتحت من همّوا ما همّ الناس لا  يعسّو عليّا هزما يعسّو و انا نترقّى في خدمتي هوما يعسّو و انا شريت دار ...  يعسّو في الدخول في الخروج  وانا كان على قلبي  دفنتو كان على مخّي جامد  ولّيت كالروبو  اما روبو مودارن  .. مانسيتش الّلي انا مرا اما نسيت الّي انا انثى .. المهمّ  ولدي ..

-السلام عليكم

- السلام لاباس اكا الرجّال لاباس

- يعيّشك حمد الله .. تصبح على خير

- ووه من توّ الستّة راهي
- اكهو ماك تعرف شارع و دار

-ربّي يعينك ربّي يعينك

- مسكينة مطلّقة صغيرة الصغاير كونشي حتّى الاربعين ماثمّاش  ووجيّهها مصلّي عالنّبي

بريّي فكّ عليّ لواش مسكينة  عايشة حرّة نفسها ارتاحت من همّ الرّجال  و الفايدة موش في الزين ابكي عالسّعد  ما عايشة كان هيا  ساعات نشوفها مروّحة  بعد هالوقيّت و تتلفّت وراها

- اللطف اللطف اللّطف سبع  الطاف

- محمّد  محمّد

- ويييي

-ايّ باهي نتفقّد فيك
-ايّا نتعشّاو

- حمد الله ماعينيش

- اسمع يا سيدي  قال لا عالماكلة راني جبت حاجة بنينة من الشارع

ما نحبّش

شبي ولدي

امّي  انا نحبّك برشة  هيّا نقّلوا

شبينا نقلوا من دارنا متاعنا

نستنّلى فيك  و اقف ورا الشبّاك  حلّيتو بش  نطلّ  كي سمعت صوتك مع الجيران انتي مشيت و هوما حكاو عليك خاطرك  مط..

- خاطر مطلّقة خلّي يقول واش يهمّ صحّة و بالشفاء خلّي ياكلوا  لحمتي بنينة  خاطر مطلّقة  ولدي عند ظهري و الحمد الله  اسمع ولدي في الدنيا هاذي يلزمك تحضّر روحك ثمّة الباهي و
ثمّة الخايب  اما انت يلزمك ديمة تكون  باهي ثمّة برشة نساء هجاجل و مطلقين و اللي فاتها العمر و اللي متهنية و اللي عيشتها مرّار حتّى الرجال زادة الفايدة كيفاش نفوتو الوجيعة  الدنيا

باهية برشة و العباد ديمة تتحدث كان ربحت كان خسرت يلزم ديمة راسك عالي و ديمة ناجح . غير انفض ريشك و اقرا على روحك

- امي نقلك حاجة

- نشاء الله خير

- البيلتان جات  اذاكة علاش نستنّى فيك

- ياخي ؟

-انا ولد مطلّقة و جيت الثالث

عيني دمعت مسكين كبر قبل وقتو  اما ياسر فرحانة  ما طلعش مصطك كيما بوه ههههه

خولة عواينية بكوش
خاطر مطلّقة