حكاية إثنين
Ameni Oueslati - أماني الوسلاتي
هبطت للة العين
ترنكوشة بنت عشرين
من فرش عالي مترين
حلت شباك برمقلي فردتين
دخلت شميسة استناتها من وين
سمات بإسم الله وقصدت رب العالمين
قربت لمولى بيتها و هو بين نومين
قلتلو صباحك فل و ياسمين
***
قهيوة فاوحة حضرت في رمشة العين
شربوها زاهين فرحانين
و هو خارج بقفة في يدو اليمين
قللها نشالله نهارك زين
زادها بوسة من فوق الجبين
حشمت حتى حمارو الخدين
قللها الحشمة زادتك زين على زين
***
هذي موش عيشة السلاطين
هذي حكاية إثنين
هذي عيشة زوز متهنين
في دار عربي ملمومين
هكا يبداو نهارهم توا سنين
مكسبهم صنعة اليدين
عالقدر و المحبة متفاهمين
و كيما قالو الناس الزمنيين
" خوذ بنات الأصول لعل الزمان يطول "
أماني الوسلاتي
Website Design Brisbane