Ameni Oueslati -  أماني الوسلاتي


.لا عيني بش نتبع قافية و لا نكتب كلام موزون، نحب نخلي قلبي يحكي و يبري الموجوع

.يقولو الطقس البارد يحير المواجع، صحيح … و خاصةً كيف تشوف زوز ماشين في الشارع

.الشتاء  طقس المحبة ، طقس النساء يعنقوا و الرجال يشدو السحابة، إي ما فيها باس

أنا سحابتي نشدها وحدي، موش هكا علمتني نعمل على روحي ؟ علمتني ما نخافش من المطر، علمتني نطعمها و نستحلي

.كل قطرة تبلي بدني … بدني إلي هو زادة توحشك

... اه كان تعرف قداش من حاجة توحشت

توحشت نشد الورقة و الستيلو و نكتب عليك، نكتب حتى الورقة توفى و الستيلو يشيح، نسلم في الكتيبة و ناقف قدام المراية و

... نكمل نحكي لروحي عليك

,توحشت نستناك على قهوة الصباح، القهوة قعدت بنينة و حلوة كيما نحبها أما مساطت بلاش بيك

... طلعت إنت إلي محليها يا سيدي، و طلعت انا كل صباح نترشفك إنت موش القهوة .. إي نستعرف

,توحشت نشدو الثنية لبلاصة بعيدة, انا نغني و إنت ترد علي، مرة تحكيلي و مرة تغنيلي، مرة نونسك و مرة يهزني النوم

الفليجة لتوة حاضرة في بالك ؟ هي زادة تستنى فيك

توحشت نرقد على صوتك إلي يحكيلي حلمة قبل ما يجيني النوم، نحلم و انا صاحية كيما في صندوق عجب، توة لا حلمة لا نوم

... توة نشوف كان  في  العجب

,توحشت نقعد نخزرلك بالسوايع، نحفظ فيك كيما دروسي, نحفظ و نعاود و بعد نشد على روحي اش حفظت

دروسي  هزهم الريح  و... تنساو و قعدتلي  إنت من مخي ما تنحيتش، كي نتوحشك نحل أوراق مخي و نبدا نورق

,الشتاء عندي موش برد و كبوط و شكلاطة سخونة, الشتاء عندي هو إنت بجنبي

... و انا راني نكذب ما توحشتكش … أنا بش نموت بالوحش