ممكن يعرفوا اسمك .. و عمرك و قسمك .. و تصويرتك .... ممكن يعرفوا ستيلك في اللبسة و وقفتك في الكبسة و صوت م الهمسة و يدك م اللمسة .. ممكن يعرفوا آما ثنية تحب اتبع و نبرة صوتك كي تندم و تتسرع ..
آما حد ما يعرفك .. حد ما يعرف شعندك .. حد ما يعرف الأوقات اللي عشتهم وحدك .. حد ما  يعرف علاش تبدلت و علاش انتي قبلك مش كيما انتي بعدك..

حد ما يعرف مطرك و برقك و رعدك، ولا ربيعك و نهار سعدك ..

حد ما يعرف صراعاتك الصغيرة، و انتصاراتك الصغيرة ، و خيباتك الصغيرة .. حد ما يعرف الصوت اللي عايش في وسطك و اللي قاعد يقرا في هالكلام .. حد ما يعرف وين هازك التخمام ولا فاش تخمم قبل المنام .. حد ما يعرف فازاتك التافهة اللي ما تفهمهم كان انت، و الضحكة اللي تضحكها بينك و بين روحك كي تصنع فيلم في مخك و تشيخ بيه، و كي تتذكر نهار مش عادي كنت ناسيه، و كي تحقق هدف كنت تاعب عليه ..
ولا كي .. توجع قلب ساكن فيه..

حد ما يعرف انت كيفاش تڨمر الحاجات و قداش عندك خيالات .. و أمنيات .. تهبط عليك في الليل تحت الكوات .. و برشا برشا حكايات .. اللي صاروا بالحق و فيهم اللي مازال سيناريوات ..

حد ما يعرف العرك اللي تعملو مع روحك قبل ما تاخو موقف .. و حواركم و غشكم على بعضكم، لا حد ما يعرف ..  حد ما يعرف شعندك في أعماق راسك .. حد ما يعرفك كي تخرج م الفقاعة، كي تعطي لمخك و قلبك صلاعة، ما يعرفك حد بعد نص الليل بساعة ..

و قد ما تحكي و تفسر و تحلل و توظف، و تحاول توضحلهم و تنقص على روحك و تخفف، حد ماهو باش يفهم فاش تخرف ..

باش تقعد ديما عندك شخصية ليك وحدك

و حد ما يعرف