حاجتي بمحبة..

Rim Elhayet - ريم الحياة

سنين و سنين نجري بين الساقين..

هذا حزار و لاخر بارد مهامو عار..

ولاخر, تي هاكة لاخر ولد الدار..

عامل في عذابي صنعة

و ضحكتي معاه بدعة..

يعني حاجة غريبة, لا تفهمها فرحة لا تفهمها تنهيدة..

سنين و سنين ملوحة نترما بين الساقين

شمعناها محبة, شمعناها راجل على صدرو نتكى

نعمل شاطح باطح.. نهبل معاه و نجن

نسافر معاه في خيالي

روما كوبا و اثينا

و للباريس نعملو تعريجة

باريس مدينة الأنوار

و في فيينا نعملوا نهار..

نهار أحمر و سخون

نهار طويل

من صنبة بورقيبا لابن خلدون

راجل منخافش منو و منخافش عليه..

لا يفركس بين كلماتي على اسمو و لنفركس بين حروفو على رسمها..

راجل نتأكد الي هو ليا في اللحظة الي هو معايا و الباقي ميهمش..

الباقي خطايا انسان.. و انا منيش رب باش نحاسب..

راجل يفهم الي انا مرى حرة..

يعرف اش فمة من داخل..

لاهامني محمد و لا أشرف و لا علي..

حاجتي به...

سنين و سنين.. رجال و ر جال..

لا عاد فهمة شكون عامل بالعاني..

شكون في قلبي عامل مغناني..

محاجتيش براجل.. حاجتي بمحبة..

ريم الحياة

Website Design Brisbane