في صوت الموجة حاجات تفكرني بيك..حتى و انتي موش معايا..و انتي موش معايا ،نخزرلو هايج كيفك البحر..صوتو كي صوتك موش الناس الكل تعرف تسمعو..

شوية الماء لي يطشني بيهم البحر ،يحب يفيقني و يقلي اخزر قدامك..

شوف ماقواني و مابعد اسراري عليك و عليهم..

فيق ،اما احلم و انتي فايق..ريحت البحر ونسمتو تهزني ليك..تفكرني بصوت النفس كي تكون معايا..يفكرني بالدفا لي فيك..ولمستك الي احن مالدنيا و ما فيها

درت على الناس الي فالكرنيش الكل قلتلهم صوروا ..صوروا البحر الليلة راو ماحلاه..

خليتهما لكل يصوروا الموجة وهي تحكي بلغتنا على حبي ليك..

كلهم ترميلهم النسمة شويا برود ..اما انا نحبك ونحس بدفاا متاع حضنك في كل تحريكة و كل ما يقوى الهوى يقوى احساسي بيك..

تعلى الموجة و يعلى سقف احلامي معاك..

حتى النسمة ما تخلينيش نشعل سيڨارو..اي كيفش انا نشعل وهي تطفيه..حتى سعات تبلو بالماء..

ماصاب جيت معايا..تفكلي السيڨارو من يدي و تعاركني..ومباعد كي المجنونة تشعل معايا