تي وينك ؟
Raoua Ben Chalbia - روعة بن شلبيّةليّا سنين نلوّج عليك
تي وينك ؟
وينك يا نصّي الثّاني ، وينك يا بئر حكاياتي
يا حامل همّي و كاتم أسراري
تي وينك ؟
نلوّج عليك من عين لعين و من واحد لواحد
ندور من بلاصة لبلاصة و في مخّي تصويرك
نستخايل فيك تعارك فيّا ، تنصح فيّا ، تلوم فيّا و تدافع عليّا.
تي وينك ؟
زعمة شسمك ؟ شنوّا لون عينيك ؟ شنوّا لونك ؟ أصلك و دينك ؟
كي تجي تشوف هذا الكلّ ما يهمّنيش ، آلّي يهمّني كوني نلقاك ، نشكيلك همّي و نحكيلك على دنيتي
تي وينك ؟
نحبّ نفرح و نفرّحك معايا ، نحب نحبّبك في أيّ حاجة نحبّها
ملخّر نحبّ نحبّك و نزيد نحبّك ، نحبّك تحبّني و تزيد تحبّني
نحبّ نحبّو حبّنا !
روعة بن شلبيّة
Website Design Brisbane