Asma Sakhri Gharsi - أسماء الصّخري الغرسي

أنا اليوم دموعي فوق بلادي هرهارة على دم أولادي إلي ماتو على إيدين ناس غدارة...

أنا أم الأمات الكل أنا إلي تشويت على كل واحد مات فيهم و دفن معاه السر...

أنا إلي عرفتهم مالصغر و سمعت أول بكية ليهم رجتلي أركاني...

أنا إلي وكلتهم من كرشي لين حسيت أول خطوة ليهم و فرحت بيهم من غير ما قلت ظهري عيّاني...

أنا إلي عطيتهم النور باش قراو...

و أنا إلي عشت معاهم حلو و مر و عرفت محبتهم ليا قبل ما حتى على خدمتي سعاو...

أنا نعرف أساميهم واحد واحد و عمري ما نسيت منهم و لا باش ننسى حتى واحد...

فرحت لفرحتهم حزنت لحزنهم ...

سمعت كل أسرارهم و كان لربي وصلت خبرهم...

عرفتهم ملي كانو صغار يحبو الحومة و العيلة...

لين كبرو و ولى واجبهم تجاهي مسؤوليتو كبيرة...

وقف مع شعبي قدام الإعصار...

شارك معاهم ثورتهم و خلاهم يعيشو بكرامة الأحرار...

إنتخبولي رئيس و حكومة و باقي ما وفاتش مهمتهم في ها العيشة المهمومة...

تقلبت حياتي و حياتهم معايا...

بكاوني كيف مشاو و بكاو والديهم معايا...

آش باش نقول و آش باش نحكي على فجيعتي بأولادي في ها الشهر الفضيل...

و آش باش يوصللكم وجيعتي بفراقهم بعد ها الخطى الجميل...

أنا بكيت أقوى من بكية أم ماهر بن عمار...

أنا شكوتي أطول من بو طارق عثماني...

أنا أنا دموعي بلتني لين باش نغرق على ولدي ماهر الڨاسمي ...

أنا أشجاري و جبالي بحزنها على العروس نزار المكشر زادت هدتلي حيلي...

أنا إلي ترْزيت في بسمة مروان هشّي...

أنا إلي تيتمت قبل ما تتيتم بنت لطفي العوادي...

أنا إلي قلبي وجعني  على عيلة الهادي المسعدي من بعد ما تبع طريق جدو...

أنا إلي غايضتني أم  ياسين الهيشري إلي حست بيه قبل ما يخرج...

أنا وحشتي أكثر من وحشة خو مروان هشي...

أنا موجوعة على فراق الأعزاز عليا إلي فداوني و فداولي شعبي بدمهم الطاهر و دفنتهم في وسط ممّو عينيا  ...

أنا أمهم و أمكم الخضراء الكبيرة إلي عشت بيكم ديما شامخة...

من عهد الإستعمار لليوم بمحبتكم ليا مازلت نقاوم بالرغم إلي أنا تاعبة و دايخة...

أنا بكيت على شهدائي بحرارة الروح ...

لكن هاذوكم واجب نزغرط عليهم و نشيع بتبسيمة ورى كل روح ...

رفرفت تودع فيا قبل ما تمشي لخالقها...

و قالتلي نخليلك وصية لأولادك إلي مازالو و بالله وصلها و لا تحرقها...

دمنا موش نادمين عليه كيف مشى فداك...

و إلي عند ربي خير آما إلي غايضنا إنو مشينا غدر من باحذاك...

قول لأولادك يا بلادنا ما ينساوش فين و علاش مشى دمنا...

و قبلنا دم أجدادنا و علاش  بكات علينا أُمّنا...

هاذي وصيتهم يا شعب و يا حكومة...

وأنا أمكم تونس وصيتي ليكم كان تصونو بكية لميمة و كل روح ماتت في بلادكم مغدورة و مظلومة

...