توشويشة
Arij Kaabachi - أريج كعباشيايجا نوشوشلك في وذنيك
ايجا نقشعرلك بدنك و نتشمت في دين ولديك
انا شهرزادك اللي قلبها ما عزق كان ليك
و الف ليلة و ليلة تسمات عليك
الشمس قريب تغرب و تهيم
ايجا نطلعو فوق قمة الاجبال و نقربو للجحيم
في ليل تلعبها سي السيد
تهز راسك لسماء تسمي اضوى نجمة باسمك و تنسبها ليك باسمك باش اسمك تحير
و تحيرلي الكلام في جوجيا
اتبع ثنيتك بيا و تنسى النجمة القطبية
و على طول الثنية توعدني بالموت
نوصلو لبيتنا انا نخطار الجنب اليمين و انت اليسار من السرير
ايجا نوشوشلك و نبدى الحكاية و قبل النهاية يسرقني النوم
نأجل الموت و انت في تحريكة شفايفي تموت
نوششلك ونبكي في وذنيك بالصوت
فماش ما تسمع و ما تقليش هالمرة سرقاتك الموت
ايجا نوشوشلك خوف لا يسمعونا الناس
اصلا فينهم الناس
سقف البيت يبعد بعد ما تحل باب الخيال و ضاع الحرام في الحلال
السقف بعد يحب يخلنا راس راس
و انت تسكر بخمرة كلامي و تنسى الكاس
نا نستر قلبي بسفساري حرير دودة نخاف لا بقلبي نغريك
توشويشة مني تنسيك تشيخك و تزهيك
تطحت يدك على قلبي و تقلي سكتو و لا بعيد ارميه
كيف ما تعلم الطير يهز ريشو بجناحاتو
بحكم المدة تعلمت نهزك لسابع سما
تمشيش تنساني و تنسى صوتي و دعيوة الخير الا وشوشتها في وذنك و حماتك من البلا
بعد ما تكمل الحكاية تمشيش تقلعني بعروقي كيف الحشيشة الزايدة في جنينة نوارك
كورقة فارغة في كتاب اسرارك
كاعواد وقيد مندية مكنفة في قاع الخابية وين انت عايش و بايع قضية
وقتها نطيح من سابع سماء
و نبكش و لصوتي معادش نلقى دواء
تلقى انت سبة و تجيني
و تتفكر اللي انا بلاك اللي مالوهش دواء
بلمساتك تدويني وهويا كل ما يقرب منك يداويك
تجي من ورايا تحط يدك على لحمي يتقشعر
و توشوش في وذني " نحبك "
و نحب الرب اللي نزل الحب في قلبي باش نحبك
و يتزعزع القلب من هاك التركينة الحزينة
و تزرع النوار
و نولي انا الجنينة و الوقيدة المشتهية و كتاب الاسرار
بعد ما تصرح اللي انت خلطت الادوار
واللي لا انا شهرزاد و لا انت شهريار
أريج كعباشي
Website Design Brisbane