توحشتو

couple-running-memoriesSouha Kouki - سهى الكوكي 



توحشتو، توحشت وجهو و تبسيمتو، توحشت ضحكتو و لمعة عينيه، توحشت نحملو و نشم ريحتو، توحشت حتى خشمو و سنيه، توحشت وقت نبدا نجبد عليه بالدم البارد و هو يغلي و فادد، توحشت نشوف الفرحة في عينيه كي نبدا قدامو،

توحشت كلامو و ملامو، توحشت بلادتو و ركاكتو، توحشت كيف يبدا يقلدني خاطر يعرف الي بالطريقة اذيكا يفددني، توحشت لهفتو كي يمرجني، توحشت نقلو نحبك و نحملو و نبوسو من كف يدو و هو يقربني القلبو و يبوسلي جبيني، توحشت كيف نعضو و بعد يعضني و بعد نتشكاو كيفاش كل واحد لحمو ولى ازرق...

و اكثر حاجة توحشتها كيف يشد بابي مشوار و يبدا ينضفلي في خشمي نحسو حنين عليا كي بابا و يقلي باش تلقى شكون يعملك هكا؟ باش تلقى شكون يحبك قدي و ما يعيفكش؟ نقلو يا خامج يقلي منين تعلمتو الخمج ماو من عندك، توحشت كيف يقلي توحشتك و انت ما توحشتنيش؟

نقلو لا يكذبني و يقلي يعطك لوا، توحشت كيف يقلي شلاغمك طلعو نتغشش و نقلو شيهمك و هو يولي يضحك و يقلي مهبولة و عليك نموت، توحشت كيف يغششني و نخليه و نمشي يخلط عليا يرضيني نقلو ابعدني ما تكلمنيش يقلي علاش ريحتي بالحوت؟

يقلي باهي ايجا باش نقلك حاجة يقربلي ندزو و نقلو نسمع من وذني موش من فمي يولي يضحك يقلي باهي استنى لحظة نقلو ابعدني ها السخطة يعطك و الله لحدة، توحشت وقت يقلي انتي كلوشارا اما نظيفة، توحشت كيف يقعد برشا ما يشوفنيش يحملني و يقلي توحشت ريحتك يا هم قداش نحبها،

توحشت كيف نبدا نلعبو و نتفارعو لين نعملو الفضح في الشارع، يقلي ما على بالي بيهم انا تو معاك انت ضايع، توحشت كيف نبداو نتبولدو عالناس، توحشتو حتى و هو بهناس توحشت وقت نتكيفو سيڤارو في زوز ، توحشت كيف يقلي شبيك كابسة روحك موش قتلك معادش تلبسو لون هذا يبدلك طبيعتك، توحشت يقلي محلاك اليوم و محلى شعرك، توحشت وقت نتعاركو و انا نبدا على عصابي و نعيط يقلي يزي الناس تتفرج نقلو ابعدني بلا مرج ...

توحشت ڤحرتو و غيرتو كيف نبدا نفدلك مع اصحابو لولاد و توحشتو كي يغنيلي و يقلي je t'aime y'a mon amour lyoum w ghodwa w pour tout jour w khali ygoulou mas7our klem el4ir éch 3ana fih...

توحشت برشا حاجات كنا نعملوهم مع بعضنا، توحشت كل شي فيه، توحشت الوقت الي معاه نعديه، توحشت كل شي لمنا توحشت حتى عركنا ومشاكلنا و همنا...

توا عنا مدة ما حكيناش يخزرلي و نخزرلو و نتعداو من بحذا بعضنا و نعلملو رواحنا ما فيبالناش ... توحشت حكاياتنا الي ما توفاش... توحشتو و يزي


بقلم تونسية متمردة


سهى الكوكي


توحشتو