توحشتك .. ما تخافش مانيش باش نقلك توحشتك نحب نشوفك .. توحشت نبرة صوتك .. سكاتك .. كلامك  .. ضحكتك .. حتى ملامك .. توحشت نكلمك و نبدى نحكيلك .. نحكيلك على نهاري كيفاش تعدى .. ننسى حتى باش نسأل على نهارك .. على تعبك

على خنَارك .. و تخرنينك .. توحشتك نكسرك راسك .. بالحكايات و نسألك .. كان موش عاجبك .. تتلعثم و ما تلقى كلامك .. تضحك .. و تقلي لا عاجبني عاجبني ..وقتها نحس روحي قوية و فرحانة .. اكثر حاجة توحشتها هي كالضحكة البهلولة الي نضحكها كي نكلمك

و اللمعة الي في عينيا تقول مشعلة كعبة فلام.. و لا كالدقة الي في قلبي الي تزعزعلي صدري.. حتى من صوتك و انت مغشش و تقلي لاهي لاهي توحشتو.. خلي عادة كي تكلمني و تقلي وينك نحس روحي عاملة عملة و انا مالدار ما خرجتش

...هذا الكل انت ما تعرفوش .. ممكن ياسر تسخايلني كيما كالبنات الي ما يتكلمو و يقولو توحشتك كان و هوما ناويين على حاجة ..كافي فاللاك و لا سهرية في قمرت .. تي تصدق ..توحشت حتى كالقهوة الي تشريها و نشربلك شطرها و نعمل روحي مولا الدار موش هنا

توحشتك و انت هابط مالكرهبة و ماشي تشري الدخان و تقلي توصي حاجة؟ و انا نفرح و نقلك شكلاطة كالفروخ الصغار .. توحشت الي كتبتو و الي في قلبي خبيتو .. ممكن ياسر انت ما توحشت فيا شيء .. و لا ممكن تكون متوحشني اكثر ملي انا متوحشتك .. و خشمك هو الي مانعك ...انا هذا الكل ما يهمنيش على خاطرني بالحق توحشتك