نتفكر كي كنت صغيرة، كنت كي نطيح و تتزلع ركايبي نروح نبكيلك و نشكيلك، تعنقني و تقلي " اللطف على بنيتي"، كانت تعنيقتك تنسيني في الوجيعة...كانت كلمة منك ترتحني و تنسيني في كل شي...

كبرت، و وليت نخبي عليك ، كبرت و كبرت الوجيعة و وليت نبكي بالسرقة، منحبش نحيرك ، كبرت و كبرت مشاكلي، بنتك كبرت قبل عمرها و انتي فيبالك بيها قوية، اما الحقيقة هي العكس...

كيفاش نجم نقلك اللي بنتك حبت و قلبها تكسر، تليعت و تكوات، كيفاش نجم نقلك اللي بنتك مقهورة و موجوعة و نحيرك...

تتفكر كي تراني عينيا مدمعة و تسألني شبيك؟ نجاوبك و نقلك مالهوا! نكذب... وقتها هو خلاني و مشا، تتفكر كي تراني حزينة و نقلك لباس تاعبة شوية؟ نكذب... وقتها تعاركت معاه و جرحني و كلامو وجعني، وقتها تمنيت نترمى عندك و نشكيلك أما ما نجمتش...

تواحشت نعنقك يا امي و نبكي عندك، تواحشت تمسحلي دمعتي و تقلي اللي يغشش بنيتي نعطيه طريحة، تواحشت نترمى عندك و نفرغ قلبي، تواحشت كلامك اللي يواسيني و في الخايب الكل ينسيني، تواحشت نرجع صغيرة و من حضنك ما نبعدش...