تنجم تاخو راجل متحبوش؟؟؟
Chaima J. - نسّايةتنجم تاخو راجل متحبوش؟؟؟
مش حتى متحبوش و متحب حد آخر لا تحب شكون غيرو ...تنجم تاخذو؟؟؟
أنا منجمش ...برشا لاموني أولهم أمي...
كيفاه ماتخذوش؟؟؟
راجل ،يخدم،عندو دار و كرهبة...
يعني أي راجل موجودة الموصفات هذي ناخذو و أنا منحبوش
أما راجل و باهي و نحبو و مازال يكون لا ماتخذوش
....
باهي أ سيدي مانخذوش أما زادة مانخوش راجل أكثر من إني نكون منحبوش نكون زادة ما خترتوش...
هاو بش نقلكم علاش لا...
أنا كيف ندادي الكل ...ممكن دارنا كابسين عليا أما برشا بنات كيفي و ممكن حتى أكثر ...
ديما نقول تو كي ناخذ اللي نحب نعمل الي نحب
نعمل اللي نحب مع اللي نحب مش اللي هوما حبوهولي
نعرف أمي و بابا يحبوني و ممكن أكثر من رواحهم
نفهم اللي هوما يحبولي الخير و بحبو يتهنو عليا
أما حتى أنا نحب لروحي الخير و نحب نتهنى زادة
أما الهنا عمرو ماكان راجل...
باهي ميسالش نفرضو اللي المرا مالها ألا دار و راجل و صغار
أما الهنا كي تاخو اللي تحبو ،اللي تترتاح معاه،اللي يعجبها ،اللي معاشرها...
يعني أنا ناخذ راجل عجبتو خاطرني عاقلة ؟؟
خاطر الناس الكل يحكو عليا بالباهي؟
خاطر سمعهم قالو خذا و ربح اللي بش ياخو بنت فلانة؟
ناخو راجل و كي نخرج معاه نتصرف بمسؤولية؟؟
نتبسم منضحكش ...
نحكي بشوي منعيطش
نشرب جي مش قهوة
هذا الكل بش سي السيد يقول لا والله مرا،عاقلةورزينة
لا لا لا أنا مش متاع هذا
عاقلة إي و مش مزية متربية على يدين رجال
نعرف العيب و منعملوش إي
أمازادة أنا طفلة يزي من كلمة مرا ...
مازلت صبية
نحب عبد يحبني كيما أنا ...
هبالي و دلالي ،ذكايا وبهامتي ،عنادي و صحة راسي
نحبو يحبني لروحي لشخصيتي ...نتصرف معاه بنتني
ماغير مانحسب العيب مالحرام ماغير مانخمم في شي
نحب نختارو ويختارني
يحكي عليا و نحكي عليه
يكتب عليا و نكتب عليه
يبعثلي عناية...يقلي كلامها ليك ...
نحب نتعاركو و يرضيني
يدللني و يبشبش بيا
يوكلني بيدو و نوكلو بيديا
و نفكلو ماكلتو و ناكلها و نتعاركو علاها
القازوز نكبو عليه منشربوش
ندوشلو بدبوزة الماء و نخليه يجري جرتي بش يرجع فازتو
أبسط حاجة منتعاملوش برسمية...
نحب نستناها ليلة عرسي بلهفة
نحب قلبي يدق ...نحب نضحك مالقلب ..مش ضحكة صفرة
نحب نستنى وقتاه يتسكر علينا باب واحد
مش نرعش و نخاف و منخليهوش يمسني
نعرف طفلة خذات راجل متحبوش وصلت عملت بنج بش متحسوش...أبسط حاجة خاطرها متحبوش
أنا منحبش يصير فيا هكا ...نحب نعيش كيما أنا
نحب أمي و بابا يفهموني لا يحسوني قبل لا يفهمو.
يخممو لي أنا منحبوش
إنجم نبات الليل نبكي منو حتى كان هو مضرنيش...
علاه نضلم في روحي و نضلم في ولد الناس معايا
أخطوني سيبوني نعيش اللي نحب نختار اللي نحب كي موحبونيش ناخو اللي نحب و كي أنا نتبع في رضايتكم و نسمع كلامكم
والله عيب حرام ...واحد يقتل روحو بالحياة على خاطر مصلحة و لا خاطر أمك و بوك جابولك راجل عاقل وباهي
كي يطلع يعرش يلعب برو؟؟
يحبش الترجي؟؟
ميحبش الحاجات اللي أنا نحبهم و نعملهم
نحب ناخوه كيفي يفهمني ...نتفاهمو
نلعبو برو و كي نربح يعشيني البرا
يهزني للستاد كي تلعب الجمعية
مش كي أمي تقلي عزري إنت تحبي الكورة
نحب نستنى ضنايا ...قطعة منو و مني يشبهلي و يشبهلو ...ندللوه و نحبوه مش نجيب بيبي و أنا أصلا منحبش بوه...
هذي حكاية لازم الناس تفهمها و تحسها
أنا مانخوش راجل منحبوش و مخترتوش...
بقلم نسّاية
Website Design Brisbane