نحط نقرا كتاب ولا حكاية تجي انتي في مخي نخمم نقول علاش برغم الحب و الشي إلي انا عطياهولك نحس إلي انتي عمرك ما حسيت بيا تقول عامل عليا مزية وليت نتمنى ترجع معايا كيف قبل

نقعدو و نحكيو و نتناقشو و نتعاركو و مبعد نرجع كيما كنا  نتمنى تبوسني و تعنقني و ترتحني و ترتح الشهوة إلي عندي  ليك ساعة كلمة نحبك و توحشتك ما يعبروش انتي بفمك كنت تقلي إلي فما برشا كلام ما يتحكاش أما يتحس كيف بدنك يمس بدني و ندخلو في غيبوبة احنا الاثنين  تتفكر انا كنت   ما نحبش نعمل علاقة قوية ما نحبش نضعف نحب ديمة نحس روحي و نشوف روحي انا المرا القوية إلي الرجال يحبوني أما انا شكون و شكون إلي يملى عيني علاش صارلي هذا معاك  ؟

علاش وليت نتصرف ضد مخي و ضد روحي عايشة في تناقض  

نتفكر أول نهار ضعفت فيه معاك عطيتك كل شي  حتى قطرتين الدم إلي الناس لكل توصي عليهم ما ستخسرتهمش  فيك   قلت إلي انتي راجلي و انا متاعك و ملكك كيما انتي متاعي و ملكي  كنت نحب بدني انتي إلي حببتني فيه كيف تبدا تحكيلي عليه كيفاش هبلك كيفاش يعجبك و كيفاش تكون ضايع و تلقى روحك كان معايا  وينو الكلام هذا توا ؟ وينو كلام الكتب إلي كنت حافظوا  !  تصدق وليت كيف نتفكرك نعيف روحي و نكره بدني و ننقم على  أي راجل أما ما نجمتش  نكرهك و نخرجك من حياتي انتي قاعد كيف العلة  على قلبي شبيك انتي تعيش حياتك و انا لا ؟  علاش هزيتلي قوتي معاك و مشيت ؟ 

معادش عرفة نعيش نحس في روحي ضايعة نحس في روحي هاك الطفلة إلي طرشة و عمية أما هي تسمع و تشوف   نلبس نخرج نصرة نخدم نصوحب نبوس و نعنق أما ما نحس شي كيف ما كنت نحس فيه معاك تقول ناكل  بلاش ملح  المشكلة معادش فيك ولا معاك المشكلة في روحي إلي ما فماش إلي ضايعة لوجت عليها و ما لقيتهاش  انا وليت نلوج عليك ولا على شوية من إلي حسيتو معاك في كل رجل نعرفو أما شي تقول ربي خلقهم لكل ذكورة كان انتي راجل  

نوم الليل إلي نهرب بش نرتاح فيه هرب نعدي الليل نتفرج في تصاورك و نتفكر في أياماتي معاك اه يا ربي راهي وجيعة نحس فيها قد ما نحكي و قد ما نكتب حد ما ينجم يفهم كيفاش الانسان إلي تعمل عليه و   تبني حياتك معاه يمشي و يخليك و يبني حياتو مع عبد أخر بسهولة تامة و ما يعتيكش حتى تفسير يمشي و يخليك معلقة بيه روحك مريضة خاطروا بعيد عليك  تعيط الناس لكل تسمع كان هو